कुठल्याही पर्यटनस्थळी किंवा धार्मिकस्थळी आपल्याला माकडांची वर्दळ अनेकदा दिसून येते. बऱ्याचदा ही माकडं आपल्या मर्कटलीला दाखवून लोकांना हैराण करतात. तामिळनाडूमधील प्रसिद्ध पर्यटनस्थळ असलेल्या कोडाई कॅनॉल येथील अशीच एक घटना घडली आहे. येथे एका माकडाने झाडाच्या फांदीवर बसून खाली ५००-५०० रुपयांच्या नोटांचा वर्षाव केला. ही घटना कोडाई कॅनॉल येथील गुना केव्ह्स येथे घडल्याचं सांगण्यात येत आहे. या ठिकाणी पर्यटकांची नेहमीच गर्दी असते. तसेच मंजुम्मल बॉईज या चित्रपटानंतर हे ठिकाण अधिकच प्रसिद्ध झालं आहे.
या बाबत समोर आलेल्या माहितीनुसार, एका माकडाने कर्नाटकहून आलेल्या काही पर्यटकांच्या बॅगेतून ५०० रुपयांच्या नोटांचं एक बंडल चोरलं. तेव्हा तिथे उपस्थित असलेल्या सर्वांना वाटलं की आता हे पैसे काही मिळत नाहीत. मात्र या माकडाने आपल्या मर्कटलीला सुरू करत झाडावर उडी मारली. तिथून तो एका उंच फांदीवर पोहोलचा. त्यानंतर या माकडाने पळवलेल्या नोटांच्या बंडलामधून एक एक नोट खाली फेकण्यास सुरुवात केली.
या संपूर्ण घटनेचा व्हिडीओ तिथे उपस्थित असलेल्या एका पर्यटकाने रेकॉर्ड केला. तसेच आता हा व्हिडीओ सोशल मीडियावर मोठ्या प्रमाणात व्हायरल होत आहे. या या व्हिडीओमध्ये माकड नोटा फाडण्याचा प्रयत्न करताना आणि त्या खाली फेकताना दिसत आहे.
व्हायरल होत असलेल्या या व्हिडीओवर लोकांकडूनही वेगवेगळ्या आणि गमतीदार कमेंट केल्या जात आहेत. आजच्या काळात पैशांना किती महत्त्व आहे हे माकडांनाही कळलंय, असं एका युझरनं लिहिलंय, तर या ५०० रुपयांच्या नोटा खऱ्या आहेत का? असा सवाल काही लोकांनी उपस्थित केला आहे.