आयपीएल पाहण्यासाठी गेलेल्या तरुणीचा विनयभंग

वानखेडे स्टेडियम येथे शनिवारी मुंबई इंडियनचा आयपीएल सामना पाहण्यासाठी गेलेल्या तरुणीचा विनयभंग केल्याची घटना घडली. पाणी देण्याच्या बहाण्याने स्वयंसेवकानेच तिच्याशी अश्लील चाळे केले. त्यानंतर तो तेथून पळत असताना तरुणीने त्याचा पाठलाग केला.

मुंबई - वानखेडे स्टेडियम येथे शनिवारी मुंबई इंडियनचा आयपीएल सामना पाहण्यासाठी गेलेल्या तरुणीचा विनयभंग केल्याची घटना घडली. पाणी देण्याच्या बहाण्याने स्वयंसेवकानेच तिच्याशी अश्लील चाळे केले. त्यानंतर तो तेथून पळत असताना तरुणीने त्याचा पाठलाग केला. तेथे बंदोबस्तासाठी असलेल्या पोलिसांनी त्याला बेड्या ठोकल्या. या घटनेमुळे स्टेडियमध्ये खळबळ उडाली होती.जनराज सतनामी (२६) असे अटक आरोपीचे नाव आहे. तक्रारदार २२ वर्षीय तरुणी महाविद्यालयीन शिक्षण घेत आहे. शनिवारी ती मित्र-मैत्रिणींसोबत वानखेडे स्टेडियम येथे मुंबई इंडियनचा आयपीएल सामना पाहण्यासाठी गेली होती. सामना संपल्यानंतर रात्री सव्वाआठच्या सुमारास निघताना ती सचिन तेंडुलकर स्टॅण्डमध्ये गेली. त्याच दरम्यान सतनामी हा स्वयंसेवक पाणी देण्यासाठी तिच्याकडे आला. तिने नकार दिला. तरीही तो पाणी देण्याच्या बहाण्याने तिच्याशी जवळीक साधण्याचा प्रयत्न करत होता. तिने दम दिल्यानंतर तो निघून गेला. त्यानंतर पुन्हा पाठीमागून येऊन तो तिच्याशी अश्लील चाळे करू लागला. तिने आरडाओरड करताच त्याने पळ काढला. तिनेही त्याचा पाठलाग केला. पुढे उभ्या असलेल्या पोलिसांना त्याला पकडायला सांगितले.पोलिसांनी त्याला पकडून मरिन ड्राइव्ह पोलिसांच्या ताब्यात दिले. सतनामी हा मशीद बंदर येथील रहिवासी आहे. मरिन ड्राइव्ह पोलीस त्याची कसून चौकशी करत आहेत.