डीजेच्या आवाजामुळे मुलीला हार्ट अटॅक; रुग्णालयाचा निष्काळजीपणा, वडिलांसमोर तडफडून मृत्यू

डीजेच्या मोठ्या आवाजाने एका १५ वर्षांच्या मुलीचा जीव घेतला. मोठा आवाजामुळे मुलगी बेशुद्ध पडली. कुटुंबीयांनी तिला उपचारासाठी रुग्णालयात नेलं, मात्र मुलीचा मृत्यू झाला. मुलीच्या कुटुंबीयांनी डॉक्टरांनी उपचारात निष्काळजीपणा केल्याचा गंभीर आरोप केला आहे. पिंकी कुमारी असं मृत्यू झालेल्या मुलीचं नाव आहे. ती हृदयरोगाने ग्रस्त होती. तिचे वडील रिक्षाचालक आहेत. मुलीच्या मृत्यूनंतर कुटुंबीयांनी आरोपी डॉक्टर आणि कर्मचाऱ्यांविरुद्ध कारवाईसाठी पोलिसांकडे तक्रार केली आहे. पोलीस या प्रकरणाची अधिक चौकशी करत आहेत.

मिळालेल्या माहितीनुसार, पिंकी कुमारीच्या शेजारी एक कार्यक्रम सुरू होता. याच दरम्यान रथासह शोभायात्रा काढण्यात आली. पिंकी तिच्या कुटुंबासह घराबाहेर शोभायात्रा पाहण्यासाठी गेली होती. डीजेचा मोठा आवाज ऐकून पिंकी अचानक बेशुद्ध पडली. त्यानंतर कुटुंबीयांनी तिला बाईकवरून रुग्णालयात नेलं. रुग्णालयात उपचाराच्या नावाखाली निष्काळजीपणा केल्याचा आरोप कुटुंबीयांनी केला आहे. 

मुलीच्या मृत्यूमुळे संतप्त झालेल्या कुटुंबीयांनी रुग्णालय प्रशासनाविरुद्ध घोषणाबाजी करत निषेध करण्यास सुरुवात केली. स्थानिक लोकही मोठ्या संख्येने तेथे पोहोचले. संतप्त लोक आरोपी डॉक्टरांवर कठोर कारवाईची मागणी करत होते. घटनेची माहिती मिळताच नगर परिषदेचे अध्यक्ष राजन नंदन सिंह देखील घटनास्थळी पोहोचले. हे स्पष्टपणे डॉक्टर आणि रुग्णालयाच्या निष्काळजीपणाचं प्रकरण आहे. जिल्हा अधिकाऱ्यांना भेटून संबंधित अधिकारी आणि डॉक्टरांवर कारवाई करण्यात येईल असं म्हटलं आहे.

वडिलांनी रिक्षा चालवून याआधी मुलीवर उपचार केले होते. मुलीचे काका मोतीलाल साह यांनी रुग्णालयात कर्तव्यावर असलेले डॉक्टर आशिष कुमार यांच्यावर उपचारात निष्काळजीपणाचा आरोप केला. रुग्णालयात पोहोचल्यानंतर सुमारे एक तासाने उपचार सुरू झाले. याचदरम्यान मुलगी वेदनेने तडफडत होती, परंतु कोणीही तिची काळजी घेतली नाही. वडिलांच्या डोळ्यादेखत मुलीने जीव सोडला. त्यांनी याबाबत स्थानिक पोलीस ठाण्यात तक्रार दाखल केली आहे. तसेच प्रशासनाकडे रुग्णालयातील सीसीटीव्ही फुटेज तपासण्याची आणि निष्काळजीपणा करणाऱ्या डॉक्टर आणि इतर कर्मचाऱ्यांवर कारवाई करण्याची मागणी केली आहे.