"अभिव्यक्ती स्वातंत्र्याचा अर्थ दुसऱ्याचा धार्मिक भावना दुखावणे नाही"; कोर्टाने फेटाळला शर्मिष्ठा पनोलीचा जामीन अर्ज

ऑपरेशन सिंदूरनंतर एका विशिष्ट धर्मावर टिप्पणी केल्याचा आरोप असलेल्या शर्मिष्ठा पनोलीचा जामीन कोर्टाने फेटाळला आहे.

Sharmistha Panoli: ऑपरेशन सिंदूरच्या पार्श्वभूमीवर सोशल मीडिया पोस्टद्वारे धार्मिक भावना दुखावल्याच्या आरोपाखाली अटक करण्यात आलेल्या इंस्टाग्राम इन्फ्लुएंसरला दिलासा देण्यास कोलकाता कोर्टाने नकार दिला आहे. कोलकाता येथील अलीपूर न्यायालयाने कायद्याची विद्यार्थिनी असलेल्या २२ वर्षीय शर्मिष्ठा पनोलीचा जामीन नाकारत १४ दिवसांची न्यायालयीन कोठडी सुनावण्यात आली.  ऑपरेशन सिंदूरनंतर बॉलिवूड कलाकारांनी बाळगलेल्या मौनावर तिने एक व्हिडिओ पोस्ट केला होता. त्यानंतर हरियाणाच्या गुरुग्राम येथून कोलकाता पोलिसांनी तिला अटक केली होती. अभिव्यक्ती स्वातंत्र्य धार्मिक भावना दुखावण्याची परवानगी देत ​​नाही, अशी टिप्पणीही यावेळी कोर्टाने केली.

कोलकता हायकोर्टाने मंगळवारी सोशल मिडिया इन्फ्लुएंसर आणि कायद्याची विद्यार्थिनी शर्मिष्ठा पनोलीला अंतरिम जामीन देण्यास नकार दिला. व्हायरल व्हिडिओबद्दल टीका झाल्यानंतर, पनोलीने तो व्हिडिओ काढून टाकला आणि एक्सवरुन माफी मागितली होती. मात्र औपचारिक तक्रार दाखल झाल्यानंतर, तिला गुरुग्राममध्ये अटक करण्यात आली आणि ट्रान्झिट रिमांडवर कोलकाता येथे आणण्यात आले होते. त्यानंतर जामीन अर्जावर सुनावणी करताना कोर्टाने शर्मिष्ठाला १४ दिवसांची न्यायालयीन कोठडी सुनावली आहे.

"या सगळ्या प्रकारामुळे आपल्या देशातील काही लोकांच्या भावना दुखावल्या गेल्या आहेत. आपल्याला अभिव्यक्ती स्वातंत्र्य आहे पण याचा अर्थ असा नाही की तुम्ही इतरांच्या भावना दुखावू शकाल. आपला देश विविधतेने भरलेला आहे," असं कोलकाता हायकोर्टाने म्हटलं.

पुण्यातील सिम्बायोसिस लॉ स्कूलची विद्यार्थिनी असलेल्या शर्मिष्ठा पनोलीला ३० मे रोजी गुरुग्राममध्ये अटक करण्यात आली होती. एफआयआरमध्ये तिच्यावर अदखलपात्र गुन्हा दाखल करण्यात आला होता. कोणतीही पूर्वसूचना न देता तिला अटक करण्यात आली. त्यामुळे तिची अटक बेकायदेशीर असल्याचा युक्तिवाद पानोलीच्या वकिलांनी केला. तर पोलिसांनी नोटीस बजावण्यात आली होती पण पनोली आणि तिचे कुटुंबिय गुरुग्रामला पळून गेले असा युक्तिवाद केला. हायकोर्टाने पनोलीचा जामीन नाकारता म्हटलं की कोलकातामध्ये दाखल झालेला प्राथमिक गुन्हा हा मुख्य खटला मानला जाईल, कारण तो आधी दाखल करण्यात आला होता.

दरम्यान, शर्मिष्ठा पनोलीने ऑपरेशन सिंदूर प्रकरणावर जातीयवादी टिप्पणी पोस्ट केल्याचा आरोप आहे. शर्मिष्ठाने अपलोड केलेल्या व्हिडिओनंतर तिला धमक्या मिळू लागल्या होत्या. वाद वाढलेला पाहून शर्मिष्ठा पनोलीने व्हिडिओ डिलिट करत त्यावरून माफीही मागितली. मात्र तरीही शर्मिष्ठा पनोली हिला अटक करण्यात आली. पनोलीवर वेगवेगळ्या समुदायांमध्ये शत्रुत्व वाढवणे, धार्मिक भावना दुखावण्याच्या उद्देशाने कृत्ये करणे, जाणूनबुजून अपमान करणे, शांतता भंग करण्यासाठी चिथावणी देणे यासह इतर संबंधित कलमांखाली विविध कलमांखाली गुन्हा दाखल करण्यात आला आहे.