माध्यमिक शिक्षक पतसंस्था निवडणूक शहरी सभासदत्वाचा मुद्दा कळीचा

सोलापूर : माध्यमिक शिक्षक पतसंस्थेचे शहरातील शिक्षकांना सभासदत्व देण्याचा मुद्दा निवडणुकीत कळीचा बनला असून याच मुद्याभोवती चारही पॅनलचा प्रचार सुरू आहे.
बाळे येथील जिल्हा माध्यमिक शिक्षक-शिक्षकेतर सहकारी पतसंस्थेच्या संचालक मंडळ निवडणुकीचा प्रचार रंगात आला आहे. शिक्षक आमदार दत्तात्रय सावंत यांनी राज्य शाळा कृती समितीचे सेवाभावी पॅनल रिंगणात उतरवले आहे. विधान परिषद निवडणुकीनंतर झालेल्या सत्कार समारंभात शहरातील माध्यमिक शाळांच्या कर्मचार्‍यांनी जिल्हा पतसंस्थेत सभासदत्व मिळण्याची अपेक्षा व्यक्त केली. आमदार सावंत यांनीही त्यांना अपेक्षापूर्तीचे आश्वासन दिले होते. हाच मुद्दा राज्य शिक्षक परिषद टीडीएफ संघटना आणि डॉ. पंजाबराव देशमुख शिक्षक परिषदेच्या प्रचारात लावून धरला जात आहे. आमदार दत्तात्रय सावंत राजकीय सोय म्हणून पतसंस्थेचे राजकारण हाती घेत असल्याचा आरोप शिक्षक परिषदेच्या पॅनलचे प्रमुख औदुंबर देशमुख यांनी केला.
कुमठे प्रशालेत एकाच दिवशी रिंगणातील चारही पॅनलनी निवडणूक प्रचाराच्या बैठका घेतल्या त्यात सोलापूर शहरातील शिक्षकांना पतसंस्थेत सभासदत्व देण्याचा मुद्दा केंद्रस्थानी राहिला. तीत पॅनलच्या प्रचारकांनी आमदार दत्तात्रय सावंत यांनाच लक्ष्य बनवत पतसंस्थेत कोट्यवधीचा गैरव्यवहार होत असताना मूग गिळून बसणार्‍या आमदार सावंतांना शिक्षकांच्या हिताचा कळवळा आलाच कसा आला असा सवालही संघटनाप्रेमी सहकार पॅनलच्या प्रचारात विचारला जात आहे. आमदार सावंत यांच्या पॅनलच्या प्रचारातही प्रचारकांची या मुद्यावर संभ्रमावस्था दिसून आली. अमोल कुलकर्णी यांनी शिक्षक सारा एक असल्याने सोलापूर शहरातील शिक्षकांना पतसंस्थेत सभासद करून घेण्यात गैर काय? असा सवाल करताच उपस्थितांनी आक्षेप घेतला त्यावर सारवासारव करीत शंकर वडणे यांनी शहरातील सभासद करणार नसल्याचे ठामपणे सांगितले. एकाच पॅनलच्या प्रचारात निर्माण झालेल्या संभ्रमामुळे मतदारही अवाक् झाले. (प्रतिनिधी)
कोट...
आमदार दत्तात्रय सावंत यांची पतसंस्थेकडे पाहण्याची भूमिका सभासदांच्या हिताची नाही. स्वत: सभासद नाहीत, त्यांच्या संघटनेचे मोजकेच पदाधिकारी सभासद असताना विधानपरिषद निवडणुकीची तजवीज म्हणून त्यांनी पॅनल उभे केले आहे.
औदुंबर देशमुख, पॅनलप्रमुख, राज्य शिक्षक परिषद.

कोट...
सोलापूर शहरातील सभासद नसलेल्या शिक्षकांची फौज आमदार सावंताच्या पॅनलसाठी उतरली आहे. शिक्षकांच्या प्रश्नापेक्षा पतसंस्थेवर एकहाती ताबा घेण्याचा त्यांचा धूर्त डाव आहे.
विश्रांत गायकवाड, उमेदवार, संघटना प्रेमी सहकार पॅनल.