भारतीय हवाई दलाचे विमान तांबरमजवळ कोसळले; कोर्ट ऑफ इन्क्वायरीचा आदेश

विमान तांबरम हवाई तळाजवळ एका निर्जन जंगल परिसरात दुपारी २ वाजण्याच्या सुमारास दुर्घटनाग्रस्त झाले.

भारतीय हवाई दलाचे एक पीसी-७ पिलाटस बेसिक ट्रेनर विमान शुक्रवारी चेन्नईजवळील तांबरम येथे नियमित प्रशिक्षण मोहिमेदरम्यान कोसळले. विमान तांबरम हवाई तळाजवळ एका निर्जन जंगल परिसरात दुपारी २ वाजण्याच्या सुमारास दुर्घटनाग्रस्त झाले.

सुदैवाने, विमान जमिनीवर कोसळण्यापूर्वीच पायलट सुरक्षितपणे बाहेर पडण्यात यशस्वी झाला. या घटनेत पायलट पूर्णपणे सुरक्षित असून, त्याला कोणतीही दुखापत झाली नाही.

भारतीय हवाई दलाने या अपघाताच्या कारणांचा शोध घेण्यासाठी 'कोर्ट ऑफ इन्क्वायरी'म्हणजेच चौकशी आयोगाचे आदेश दिले आहेत. अपघाताच्या नेमक्या कारणांची चौकशी पूर्ण झाल्यावर पुढील माहिती उपलब्ध होईल. पीसी-७ पिलाटस हे विमान हवाई दलाच्या कॅडेट्सच्या प्राथमिक उड्डाण प्रशिक्षणासाठी वापरले जाते.