देशात HMPV व्हायरसची प्रकरणं सतत नोंदवली जात आहेत. याच दरम्यान, आसाममध्येही एक प्रकरण समोर आले आहे. लखीमपूरमध्ये, एका १० महिन्यांच्या मुलाला HMPV व्हायरसची लागण झाली आहे. सध्या मुलाला दिब्रुगडमधील आसाम मेडिकल कॉलेज आणि हॉस्पिटलमध्ये दाखल करण्यात आलं आहे. डॉक्टरांचं म्हणणं आहे की, मुलाची प्रकृती स्थिर आहे आणि काळजी करण्यासारखं काहीही नाही.
आसाममधील या प्रकरणासह, देशात ह्युमन मेटान्यूमोव्हायरस (HMPV) प्रकरणांची एकूण संख्या १५ वर पोहोचली आहे. गुजरातमध्ये सर्वाधिक ४ प्रकरणे आहेत. शुक्रवारी राजस्थान आणि गुजरातमध्ये प्रत्येकी एक रुग्ण आढळला. यापूर्वी गुरुवारी ३ प्रकरणे नोंदवली गेली होती. रुग्णांची संख्या सातत्याने वाढत असल्याने लोकांमध्ये भीतीचे वातावरण निर्माण झाले आहे.
ह्युमन मेटाप्न्यूमोव्हायरस (HMPV) मुळे चीनमध्ये या आजाराचे रुग्ण वाढत आहेत. अलिकडच्या काळात रुग्णसंख्येत वाढ झाल्याच्या वृत्तांमुळे, सिक्कीम सरकारने परिस्थितीवर बारकाईने लक्ष ठेवण्यासाठी एक सूचना जारी केली आहे. एका वरिष्ठ अधिकाऱ्याने सांगितले की, मुख्य सचिवांनी अलीकडेच आरोग्य आणि कुटुंब कल्याण विभागासोबत सध्याच्या धोक्याचे मूल्यांकन करण्यासाठी आणि राज्याच्या तयारीचा आढावा घेण्यासाठी बैठक घेतली.
या बैठकीत व्हायरसचे विविध पैलू आणि त्याच्या संसर्गाची पद्धत तसेच संसर्ग झाल्यावर उद्भवणाऱ्या लक्षणांवर चर्चा करण्यात आल्याचे अधिकाऱ्याने सांगितले. अधिकाऱ्याने सांगितलं की, आरोग्य आणि कुटुंब कल्याण विभाग सतत परिस्थितीवर लक्ष ठेवून आहे. साबणाने सतत हात स्वच्छ धुवा, मास्क घाला असा सल्ला देण्यात येत आहे.