मेहुण्याच्या पत्नीसोबत अनैतिक संबंध ठेवून १० वर्षांपासून एकत्र राहत असलेल्या इसमाने तिच्यासोबत झालेल्या किरकोळ वादानंतर जीवन संपल्याची धक्कादायक घटना उत्तर प्रदेशमधील इटावा इथे घडली आहे. अनिल असं या इसमाचं नाव असून, त्याचे त्याच्या मेहुण्याच्या पत्नीसोबत प्रेमप्रकरण सुरू होते. एवढंच नाही तर गेल्या १० वर्षांपासून ते एकत्र राहत होते. दरम्यान, दोन महिन्यांपूर्वी काही कारणांवरून नाराज होऊन सदर महिला सासरी निघून गेली होती. त्यानंतर अनिल हा तिची समजूत काढण्यासाठी तिच्या सासरी गेला. मात्र तिने त्याचं म्हणणं ऐकलं नाही. त्यामुळे संतापलेल्या अनिल याने कट्ट्याद्वारे आपल्या डोक्यात गोळी झाडून घेत जीवन संपवलं. मात्र आता ही आत्महत्या नसून हत्या असल्याचा आरोप मृताच्या नातेवाईकांनी केला आहे. या प्रकरणी पोलीस पुढील तपास करत आहेत.
हे संपूर्ण प्रकरण बकेवर पोलीस ठाण्याच्या हद्दीतील हालुपूरा गावातील आहे. येथील ५० वर्षीय अनिल नावाच्या इसमाचे त्याच्या मेव्हण्याच्या पत्नीसोबत प्रेमसंबंध होते. या प्रेमसंबंधांची कुणकूण लागल्यानंतर अनिल याच्या मेव्हण्याने पत्नीला घराबाहेर काढले होते. तेव्हापासून ती औरैया येथील तिच्या माहेरी राहत होती.
तिथे अनिल याचं येणं जाणं सुरू झालं होतं. तसेच अनिल हा काही काळानंतर तिच्यासोबत राहू लागला होता. अनिल याला तीन मुलं होती. त्यापैकी मोठ्या मुलीचं लग्न झाले आहे. एका मुलाचा मृत्यू झाला आहे. तर धाकट्या मुलाचंही लग्न झालेलं आहे. अनिल याच्या पत्नीचा दोन वर्षांपूर्वी जळून मृत्यू झाला होता. अनिल याच्या मेहुण्याच्या पत्नीलाही दोन मुलगे आणि एक मुलगी अशी तीन मुलं आहेत. त्यांचे विवाह झाले आहेत.
अनिल हा सुमारे १० वर्षांपासून या महिलेसोबत राहत होता. दोघांमध्ये दोन महिन्यांपूर्वी काही कारणावरून भांडण झालं होतं. त्यानंतर ही महिला पुन्हा सासरी राहायला गेली होती. त्यानंतर अनिल तिची समजूत काढून तिचा रुसवा दूर करण्यासाठी तिच्या सासरी गेला. मात्र तिने त्याच्यासोबत येण्यास नकार दिला. अनिल हा तिला मारहाण करायचा असा आरोपही आता केला जात आहे. दरम्यान, या महिलेने अनिलसोबत येण्यास नकार दिल्यावर अनिल याने डोक्यावर कट्टा लावून गोळी झाडली आणि जीवन संपवलं.