"दुसऱ्याचं श्रेय लाटणं खपवून घेतलं जाणार नाही"; गलगोटिया युनिव्हर्सिटीच्या 'रोबोट' वादावर सरकारने सुनावले खडे बोल

गलगोटिया युनिव्हर्सिटीच्या वादावर सरकारने मोठी प्रतिक्रिया दिली.

AI Summit Controversy:दिल्लीत पार पडलेल्या आर्टिफिशियल इंटेलिजन्स इम्पॅक्ट समिटमध्ये गलगोटिया युनिव्हर्सिटीच्या रोबोटिक डॉगवरून निर्माण झालेल्या वादावर आता केंद्र सरकारने आपली भूमिका स्पष्ट केली आहे. "समिटमध्ये खरे कसब आणि संशोधन दिसणे आवश्यक आहे; चुकीच्या माहितीला किंवा दुसऱ्याचे संशोधन आपले म्हणून सांगण्याच्या वृत्तीला सरकार कधीही प्रोत्साहन देणार नाही," अशा कडक शब्दांत सरकारने या प्रकरणावर भाष्य केले आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

आर्टिफिशियल इंटेलिजन्स समिटमध्ये गलगोटिया युनिव्हर्सिटीच्या वतीने एक रोबोटिक डॉग प्रदर्शनासाठी ठेवण्यात आला होता. युनिव्हर्सिटीच्या प्रतिनिधीने हा रोबोट स्वतः विकसित केल्याचा दावा केला होता. मात्र, सोशल मीडियावर नेटकऱ्यांनी हा रोबोट चीनमधून विकत घेतल्याचा आरोप करत युनिव्हर्सिटीला ट्रोल करण्यास सुरुवात केली. हा वाद इतका वाढला की, युनिव्हर्सिटीला समिटमधून आपला स्टॉल तातडीने रिकामा करण्यास सांगण्यात आले.

सरकारची अधिकृत भूमिका

इलेक्ट्रॉनिक्स आणि माहिती तंत्रज्ञान मंत्रालयाचे सचिव एस. कृष्णन यांनी एका पत्रकार परिषदेत या वादावर स्पष्टीकरण दिले. "दुसऱ्याचे काम स्वतःचे म्हणून सांगण्याच्या कृतीचे आम्ही समर्थन करत नाही. चुकीची माहिती पसरवणे चुकीचे आहे, म्हणूनच आम्ही या वादापासून लांब राहण्यासाठी युनिव्हर्सिटीला स्टॉल हटवण्यास सांगितले," असं एस. कृष्णन यांनी सांगितले.

सर्टिफिकेशन नाही, केवळ प्रदर्शन

"समिटमध्ये मांडलेल्या वस्तूंना सरकार आधीच प्रमाणपत्र देत नाही. हे एक नाविन्यपूर्ण व्यासपीठ आहे. जेव्हा एखादा संशोधक उत्पादन दाखवतो, तेव्हा त्याला त्याबद्दल पूर्ण माहिती असेल असे गृहीत धरले जाते. जर आम्ही प्रत्येक गोष्टीचे आधीच सर्टिफिकेशन करू लागलो, तर संशोधनावर मर्यादा येतील. सरकारचा उद्देश कोणाच्याही संशोधनाची गळचेपी करण्याचा नाही, मात्र पारदर्शकता असणे आवश्यक आहे," असेही एस. कृष्णन यांनी म्हटले.

गलगोटिया युनिव्हर्सिटीचा माफीनामा

वादानंतर १८ फेब्रुवारी रोजी गलगोटिया युनिव्हर्सिटीने अधिकृत प्रसिद्धी पत्रक जारी करून जाहीर माफी मागितली आहे. युनिव्हर्सिटीने म्हटले की, "समिटमध्ये झालेल्या गोंधळाबद्दल आम्ही मनापासून माफी मागतो. आमच्या एका प्रतिनिधीला त्या उत्पादनाची तांत्रिक माहिती नव्हती आणि कॅमेऱ्यासमोर येण्याच्या उत्साहात तिने चुकीची माहिती दिली. वास्तविक, तिला प्रसारमाध्यमांशी बोलण्याचे अधिकार दिलेले नव्हते."