दिल्लीचे जवाहरलाल नेहरू स्टेडियम तोडले जाणार; केंद्रीय क्रीडा मंत्रालयाचा मोठा निर्णय

स्पोर्ट्स अथॉरिटी ऑफ इंडियाची मालकी असलेल्या या स्टेडिअमची बांधणी १९८२ ला आशियाई खेळांसाठी करण्यात आली होती. यानंतर तिथे अनेक स्पर्धा खेळविण्यात आल्या आहेत.

नवी दिल्ली: राष्ट्रीय राजधानी दिल्लीतील क्रीडा क्षेत्रासाठी एक अत्यंत महत्त्वपूर्ण आणि मोठा निर्णय घेण्यात आला आहे. सध्याचे जवाहरलाल नेहरू स्टेडियम पाडून, त्याच्या जागी १०२ एकर जागेवर एक अत्याधुनिक 'स्पोर्ट्स सिटी' उभी करण्याचा निर्णय घेण्यात आला आहे.

केंद्रीय क्रीडा मंत्रालयाच्या उच्चस्तरीय सूत्रांनी आजतकला ही माहिती दिली आहे. या भव्य प्रकल्पासाठी क्रीडा मंत्रालयाचे अधिकारी कतार आणि ऑस्ट्रेलिया सारख्या देशांमध्ये यशस्वी ठरलेल्या आधुनिक क्रीडा संकुलांच्या मॉडेलचा सखोल अभ्यास करत आहेत. दिल्लीत आंतरराष्ट्रीय दर्जाचे क्रीडा पायाभूत सुविधा तयार करणे आणि राजधानीला जागतिक स्तरावरील क्रीडा केंद्र म्हणून स्थापित करणे, हा यामागचा मुख्य उद्देश आहे.

एकात्मिक आणि आधुनिक केंद्र

क्रीडा मंत्रालयाच्या अधिकाऱ्यांनी स्पष्ट केले की, सध्या जवाहरलाल नेहरू स्टेडियम ज्या जागेवर आहे, त्या संपूर्ण १०२ एकर जमिनीचा विकास केला जाईल. ही नवीन 'स्पोर्ट्स सिटी' देशातील प्रमुख आणि सर्वात मोठ्या क्रीडा सुविधांपैकी एक असेल. या प्रकल्पामुळे खेळांसाठी समर्पित, एकात्मिक आणि आधुनिक सुविधा असलेले केंद्र दिल्लीत साकार होईल, ज्यामुळे खेळाडूंना सर्वोत्तम प्रशिक्षण आणि आंतरराष्ट्रीय स्पर्धांसाठी उत्तम ठिकाण उपलब्ध होईल.

१९८२ ला उभारणी...

स्पोर्ट्स अथॉरिटी ऑफ इंडियाची मालकी असलेल्या या स्टेडिअमची बांधणी १९८२ ला आशियाई खेळांसाठी करण्यात आली होती. यानंतर तिथे अनेक स्पर्धा खेळविण्यात आल्या आहेत. २०१० ला राष्ट्रकुल खेळांसाठी या स्टेडिअमची पुर्नबांधणी करण्यात आली आहे. सध्या या स्टेडिअममध्ये ६० हजार प्रेक्षकांसाठी आसन क्षमता आहे.