Ditwah: 'दितवा' चक्रीवादळ कोणत्याहीक्षणी धडकणार; 'या' ३ राज्यांना रेड अलर्ट, ४७ उड्डाणे रद्द!

Ditwah Cyclone: श्रीलंकेत अनेकांचे कुटंब उद्ध्वस्त करणारे दितवा चक्रीवादळ बंगालच्या उपसागरात प्रवेश करत भारताकडे सरकत आहे.

नैऋत्य बंगालच्या उपसागरातून उत्तरेकडे सरकत असलेल्या 'दितवा' चक्रीवादळामुळेतामिळनाडू आणि पुद्दुचेरीमध्ये हवामानाची परिस्थिती गंभीर झाली असून, जनजीवनावर मोठा परिणाम झाला आहे. खराब हवामानामुळे चेन्नई आंतरराष्ट्रीय विमानतळाने रविवारी एकूण ४७ उड्डाणे रद्द केली. यात ३६ देशांतर्गत आणि ११ आंतरराष्ट्रीय सेवांचा समावेश आहे. विमानतळ अधिकाऱ्यांनी दिलेल्या माहितीनुसार, कामकाजात अजूनही व्यत्यय येत असून आणखी उड्डाणे विस्कळीत होण्याची शक्यता आहे. प्रवाशांना गैरसोयी टाळण्यासाठी विमानतळावर येण्यापूर्वी संबंधित विमान कंपन्यांचे अपडेटेड फ्लाइट वेळापत्रक तपासण्याचा सल्ला देण्यात आला.

हवामान खात्याचा इशारा

भारतीय हवामान खात्याने तामिळनाडू, पुद्दुचेरी आणि दक्षिण आंध्र प्रदेशच्या किनारी भागांसाठी 'रेड अलर्ट' जारी केला आहे. चक्रीवादळ आज, ३० नोव्हेंबरच्या सकाळपर्यंत तामिळनाडू-पुद्दुचेरी किनाऱ्यालगत सरकेल. हवामान खात्याने चेन्नईसह तामिळनाडूतील आणि पुद्दुचेरीच्या विविध जिल्ह्यांसाठी पुढील तीन तासांसाठी येलो अलर्ट जारी केला आहे. या काळात वादळ आणि विजांच्या कडकडाटासह हलका ते मध्यम पाऊस पडण्याची शक्यता आहे.

'या' जिल्ह्यांमध्ये अतिवृष्टीचा धोका

दितवा चक्रीवादळाच्या प्रभावामुळे अनेक जिल्ह्यांमध्ये मुसळधार ते अतिमुसळधार पाऊस पडण्याची शक्यता आहे. हवामान खात्याने दिलेल्या माहितीनुसार, कुड्डालोर, नागापट्टिनम, मयिलादुथुराई, विल्लुपुरम, चेंगलपट्टू, पुद्दुचेरी-करैकल, तंजावर, तिरुचिरापल्ली, चेन्नई, कांचीपुरम, तिरुवल्लूर आणि रानीपेट या भागांत अतिवृष्टी होण्याची शक्यता आहे.  याव्यतिरिक्त, वेल्लोर, धर्मपुरी, दिंडीगुल आणि थेनी येथेही मुसळधार पाऊस पडण्याची शक्यता आहे.

नागरिकांना आवाहन

हवामान खात्याने शनिवारी दिलेल्या माहितीनुसार, दितवा चक्रीवादळाची तीव्रता कमी झाली असली तरी ते अजूनही धोकादायक आहे. हे वादळ सध्या तामिळनाडू-पुद्दुचेरी किनाऱ्याकडे सरकत आहे. दरम्यान, जोरदार वारे आणि उंच लाटांच्या धोक्यामुळे मच्छिमारांना समुद्रात जाऊ नये, असा स्पष्ट सल्ला देण्यात आला आहे. भारतीय हवामान खात्याने आणि जिल्हा प्रशासनाने नागरिकांना घरातच राहण्याचे, समुद्रकिनारे टाळण्याचे आणि अधिकृत मार्गदर्शक तत्त्वांचे पालन करण्याचे आवाहन केले आहे.