सोनिया गांधी रूटीन चेकअपसाठी शिमला येथील IGMC हॉस्पिटलला दाखल; उपचारानंतर घरी सोडले

४ दिवसांपूर्वी खासगी दौऱ्यावर सोनिया गांधी या फार्म हाऊसवर आल्या होत्या.

नवी दिल्ली - काँग्रेस नेत्या सोनिया गांधी यांची शनिवारी तब्येत बिघडली. ब्लड प्रेशर वाढल्याने त्यांना तातडीने शिमला येथील इंदिरा गांधी मेडिकल कॉलेज रुग्णालयात दाखल करण्यात आले. याठिकाणी डॉक्टरांच्या देखरेखीत त्यांच्यावर उपचार करण्यात आले. सोनिया गांधी रुटीन चेकअपसाठी हॉस्पिटलला आल्याचे तिथले ज्येष्ठ मेडिकल सुप्रीडेंट डॉ. राहुल राव यांनी सांगितले.

मुख्यमंत्री सुखविंदर सिंग यांच्या माध्यम सल्लागारांनी सांगितले की, सोनिया गांधी प्रकृतीच्या कारणास्तव रूटीन तपासासासाठी हॉस्पिटलला आल्या होत्या. त्यांची प्रकृती स्थिर आहे अशी माहिती त्यांनी दिली. सोनिया गांधी २ जून रोजी शिमला येथे आल्या होत्या. इथल्या छराबडा येथील फार्म हाऊसवर त्या मुक्कामी होत्या. शिमलापासून १३ किमी अंतरावर छराबडा येथे हे फार्म हाऊस आहे. या फार्महाऊस समोरच बर्फाचे डोंगर आहेत. सोनिया गांधींसह राहुल आणि प्रियंका गांधी उन्हाळ्याच्या सुट्टीत याठिकाणी सुट्टी साजरी करण्यासाठी येतात. 

#WATCH Shimla, Himachal Pradesh: Congress Parliamentary Party Chairperson Sonia Gandhi left Shimla's Indira Gandhi Medical College and Hospital after a medical check-up. She had come here for a routine health check-up due to some minor health problems. pic.twitter.com/oDxgcL76kd

— ANI (@ANI) June 7, 2025

४ दिवसांपूर्वी खासगी दौऱ्यावर सोनिया गांधी या फार्म हाऊसवर आल्या होत्या. आज नियमित तपासणीसाठी त्या इंदिरा गांधी मेडिकल कॉलेज, शिमला येथे गेल्या. तिथे विशेष डॉक्टरांच्या एका टीमने त्यांच्या देखरेखीत काही चाचण्या केल्या. सोनिया गांधी यांना विशेष व्हिआयपी वार्डमध्ये दाखल केले आणि डॉक्टरांच्या उपस्थितीत त्यांचे चेकअप करण्यात आले अशी बातमी समोर आली होती. हॉस्पिटल प्रशासनाने सुरक्षेच्या कारणास्तव पूर्ण परिसरात अलर्ट ठेवला होता. त्याशिवाय पोलिसांची संख्याही मोठ्या प्रमाणात होती. 

२०२४ मध्येही सोनिया गांधींची तब्येत बिघडली होती

मार्च २०२४ मध्ये सोनिया गांधी यांची तब्येत बिघडल्याने दिल्लीच्या गंगाराम हॉस्पिटलमध्ये त्यांना भरती केले होते. ७६ वर्षीय सोनिया गांधी यांना ताप आला होता. त्याआधी ५ जानेवारी २०२४ रोजीही व्हायरल इंफेक्शनमुळे त्यांना हॉस्पिटलला दाखल केले होते. १२ जून २०२२ मध्ये सोनिया गांधी यांना कोरोना झाल्याने उपचारासाठी रुग्णालयात दाखल केले. १ जून रोजी त्यांचा कोरोना पॉझिटिव्ह रिपोर्ट आला होता.