राजनांदगाव: छत्तीसगडमधील राजनांदगाव जिल्ह्यात एक मोठा अपघात झाला आहे. पुलावर आदळल्यानंतर एका कारने पेट घेतला, या अपघातात एकाच कुटुंबातील पाच जणांचा होरपळून मृत्यू झाला. तीन मुलींसह पती-पत्नी एका लग्न समारंभातून घरी परतत असताना हा अपघात झाला.
पोलिसांनी दिलेल्या माहितीनुसार, गुरुवार-शुक्रवारी मध्यरात्री राजनांदगाव खैरागड रोडवरील थेलकाडीह पोलीस स्टेशन अंतर्गत सिंगारपूर गावात हा अपघात झाला. लग्नातून परतत असताना अल्टो गाडी पुलावर आदळल्यानंतर गाडीने पेट घेतला. यात खैरागडच्या गोलबाजार येथील रहिवासी असलेल्या कोचर कुटुंबाचा होरपळून मृत्यू झाला. हे कुटुंब बालोद येथील एका लग्न समारंभातून घरी परतत होते. मृतांमध्ये पती पत्नी आणि तीन 20-25 वर्षांच्या मुलींचा समावेश आहे.
घटनेची माहिती मिळताच पोलीस घटनास्थळी पोहोचले. राजनांदगावचे अतिरिक्त पोलिस अधीक्षक संजय महादेवा यांनी सांगितले की, पोलिस आणि फॉरेन्सिक टीम या घटनेचा तपास करत आहेत. पंचनामा करुन मृतदेह शवविच्छेदनासाठी पाठवण्यात आले आहेत. फॉरेन्सिक तपासणी अहवाल आल्यानंतरच अपघाताचे नेमके कारण समोर येईल.