भोपाळ : मध्य प्रदेशमध्ये मुख्यमंत्र्यांवर दगडफेक केल्याची घटना ताजीच असताना भाजपच्या आमदाराच्या मुलाने काँग्रेस खासदार ज्योतिरादित्य सिंधिया यांना गोळी घालण्याची सार्वजनिक धमकीच देऊन टाकली आहे. सोशल मिडियावर ही पोस्ट टाकल्याने भाजपवर टीका होत असून आमदार उमा देवी खाटीक यांनी मुलाच्या कृत्याबद्दल नाराज व्यक्त केली आहे.
मध्य प्रदेशच्या दमोह जिल्ह्यातील हटा विधानसभा मतदारसंघातून उमा देवी खटीक या निवडून आल्या आहेत. या मतदारसंघात काँग्रेसचे खासदार ज्योतिरादित्य सिंधिया फिरकल्यास त्यांच्यावर बंदुकीची गोळी झाडू आणि त्यांना ठार करू अशी धमकीच त्यांच्या मुलाने दिली आहे. प्रिंसदीप असे या मुलाचे नाव असून त्याने ज्योतिरादित्य यांचा एकेरी नावाने उल्लेख केला आहे.
या धमकीवर सिंधिया यांनी टीका करताना, भाजपचा खरा चेहरा समोर आला असल्याचे म्हटले आहे. भाजप सरकार त्यांचे नेते आणि मुख्यमंत्री शिवराजसिंह चौहान यांचे काँग्रेस नष्ट करण्याचे स्वप्न आहे. अशा धमक्यांमुळे आपण घाबरणार नाही, असेही त्यांनी सांगितले.