बिहारच्या भागलपूरमधून हृदय पिळवटून टाकणारी घटना समोर आली आहे. मुलीचा जन्म झाल्यामुळे नाराज झालेल्या आई-वडिलांनी तिला गंगा नदीत टाकून दिल्याची धक्कादायक घटना घडली आहे. पण, सुदैवाने चिमुकली नदीत पडण्याऐवजी नदीवरील विक्रमशिला पुलाच्या गर्डरवर अडकली आणि तिचा जीव वाचला.
मिळालेल्या माहितीनुसार, नवगचिया आणि भागलपूर शहराला जोडणाऱ्या विक्रमशिला पुलावरुन एक व्यक्ती जात असताना त्याला मुलीच्या रडण्याचा आवाज ऐकू आला. पुलाच्या खांबाजवळ या मुलीचा रडण्याचा आवाज ऐकू येत होता. यानंतर वाहतूक पोलिसांना माहिती देण्यात आली. बिहार पोलीस कर्मचाऱ्यांनी रात्रीच्या अंधारात जीव धोक्यात घालून गर्डरवर चढून मुलीची तेथून सुखरूप सुटका केली.
धक्कादायक बाब म्हणजे, निर्दयी पालकांनी चिमुकलीला एका पिशवीत टाकून फेकून दिले होते. सुदैवाने पिशवी पुलाच्या गर्डरवर अडकली. यानंतर तत्काळ एसडीओ आणि डीएसपींना याची माहिती दिली आणि मुलीला उपचारासाठी मायागंजच्या जेएलएनएमसीएच हॉस्पिटलमध्ये दाखल करण्यात आले. आता त्या मुलीला चाइल्डलाइनच्या मदतीने अनाथाश्रमात ठेवण्यात येणार आहे.
या घटनेचा एक व्हिडिओही सोशल मीडियावर व्हायरल होत आहे. व्हिडिओमध्ये पुलाच्या रेलिंगच्या काठावर असलेल्या गर्डरवर पिशवीत कपड्यात मुलगी गुंडाळलेली दिसत आहे. यावेळी पोलीस कर्मचाऱ्याने जीव धोक्यात घालून मुलीला वाचवले. थोडाही उशीर झाला असता, तर ती मुलगी नदीत पडली असती.