MP Money Laundering Case :अंमलबजावणी संचालनालयाने मनी लॉन्ड्रिंग प्रकरणात मध्य प्रदेशातील अनेक जिल्ह्यांमध्ये छापे टाकून ३३ कोटी रुपयांहून अधिकची मालमत्ता जप्त केली आहे. गेल्या आठवड्यात ईडीने पीएमएलए अंतर्गत भोपाळ, ग्वाल्हेर आणि जबलपूर जिल्ह्यातील अनेक ठिकाणी छापे टाकले होते. सौरभ शर्मा आणि इतरांविरुद्ध दाखल झालेल्या गुन्ह्यांच्या संदर्भात ही कारवाई करण्यात आली होती. ईडीने सौरभ शर्मा आणि त्याचे जवळचे सहकारी चेतन सिंग गौर, शरद जैस्वाल आणि रोहित तिवारी यांच्या घरावर छापे टाकले होते.
ईडी, आयकर विभाग आणि मध्य प्रदेश लोकायुक्तांचे विशेष पोलीस आस्थापना (एसपीई), राज्य सरकारचे भ्रष्टाचार विरोधी पथक सौरभ शर्मा या व्यक्तीच्या शोधात आहेत. १९ डिसेंबर रोजी भोपाळ जिल्ह्यातील एका गावात एका सोडलेल्या वाहनातून ११ कोटी रुपयांची रोकड आणि ५२ किलो सोने जप्त करण्यात आले होते. तपासादरम्यान, सौरभ शर्माने त्याच्या कुटुंबातील सदस्य आणि इतर अनेक कंपन्यांच्या नावावर कोट्यवधींची मालमत्ता मिळवली. सौरभ शर्माने आपल्या कुटुंबातील सदस्य, मित्र आणि कंपन्यांच्या नावावर अनेक मालमत्ता खरेदी केल्याचे समोर आले आहे. या कंपन्यांचे संचालक त्याच्या अगदी जवळचे होते.
भोपाळ, ग्वाल्हेर आणि जबलपूरमध्ये तपास यंत्रणांनी ८ ठिकाणी छापे टाकले असता चेतन सिंह गौरच्या नावावर ६ कोटी रुपयांहून अधिकची एफडी सापडली. तसेच सौरभ शर्माच्या कुटुंबातील सदस्य आणि कंपन्यांच्या नावावर ४ कोटींहून अधिक रक्कम बँकेत जमा आहे.. याशिवाय कुटुंबातील सदस्य आणि कंपन्यांच्या नावावर २३ कोटी रुपयांहून अधिक किमतीच्या स्थावर मालमत्तेशी संबंधित कागदपत्रे सापडली आहेत.
सौरभ शर्मा कोण आहे?
ग्वाल्हेरचे रहिवासी असलेला सौरभ शर्मा उर्फ चिनू हे स्पर्धा परीक्षांचे उमेदार होता. १२th फेल हा बहुचर्चित चित्रपट ज्यांच्यावर आधारित आहे. अशा नागरी सेवा परीक्षांची तयारी करत असलेल्या अनेक ग्रुपमध्ये तो सहभागी होता. राज्य नागरी सेवा परीक्षेतही तो मुलाखतीच्या टप्प्यापर्यंत पोहोचला होता. त्याचे वडील सरकारी कर्मचारी होती. वडिलांच्या निधनानंतर शर्मा याने अनुकंपा तत्त्वावर वाहतूक विभागात हवालदार म्हणून नियुक्ती मिळवली. सूत्रांनी मात्र अनुकंपा तत्त्वावर त्याची नियुक्ती वादाच्या भोवऱ्यात सापडली आणि शेवटी शर्माने राजीनामा दिला. त्यानंतर त्याने बांधकाम व्यवसाय सुरू केला.
१९ डिसेंबर रोजी, लोकायुक्तच्या पथकाने भोपाळमध्ये शर्माशी संबंध असलेल्या दोन ठिकाणी छापे टाकले आणि सोने आणि चांदी व्यतिरिक्त २.१ कोटी रुपयांची रोकड जप्त केली. मेंदोरी गावात एका शेतात उभ्या असलेल्या वाहनाबाबत आयकर विभागाला माहिती मिळाल्यानंतर खरी वसुली झाली. सरकारमध्ये संपर्क असलेल्या एका बिल्डरच्या घरावर आयकर विभागाचे अधिकारी छापे पडल्याने सगळीकडेच याची चर्चा सुरु झाली होती. ‘प्रादेशिक परिवहन अधिकारी’ (आरटीओ) प्लेट आणि सायरन असलेले वाहन पथकाला सापडल्यानंतर त्याची झडती घेण्यात आली. गाडीत ११ कोटी रुपये रोख आणि ५२ किलो सोने सापडले.
सौरभ शर्मा सध्या बेपत्ता आहे. त्याचा अटकपूर्व जामीन अर्ज फेटाळण्यात आला आहे. २७ डिसेंबर रोजी, ईडीने शर्मा आणि त्याचे नातेवाईक आणि व्यावसायिक सहकारी यांच्याशी संबंध असलेल्या परिसराची झडती घेतली. आयकर विभागाने त्यांना नोटीस बजावली आहे. तर लोकायुक्तांनी राज्य गुन्हे अन्वेषण विभागाला शर्मा याच्यासाठी लुकआउट नोटीस जारी करण्यास सांगितले आहे.