अंकिता भंडारी हत्या प्रकरण : भाजप नेत्याच्या मुलासह तिघांना जन्मठेप; २ वर्षे ८ महिन्यांनी निकाल

कोटद्वार जिल्हा न्यायालयाच्या न्यायाधीश रीना नेगी यांनी २ वर्षे ८ महिन्यांनंतर या प्रकरणात निकाल दिला.

कोटद्वार : उत्तराखंडमधील बहुचर्चित अंकिता भंडारी हत्या प्रकरणात न्यायालयाने भाजप नेता आणि माजी मंत्र्याचा मुलगा पुलकित आर्यसह ३ जणांना जन्मठेपेची शिक्षा सुनावली आहे. पुलकितसह त्याचे दोन कर्मचारी सौरभ भास्कर आणि अंकित गुप्ता यांनाही शिक्षा सुनावण्यात आली. कोटद्वार जिल्हा न्यायालयाच्या न्यायाधीश रीना नेगी यांनी २ वर्षे ८ महिन्यांनंतर या प्रकरणात निकाल दिला.

अंकिता ऋषिकेशमधील पुलकित आर्यच्या रिसॉर्टमध्ये रिसेप्शनिस्ट म्हणून काम करत होती. अंकिता १८ सप्टेंबर २०२२ रोजी बेपत्ता झाली. २४ सप्टेंबर २०२२ रोजी अंकिताचा मृतदेह चिला कालव्यात आढळला होता.

पुलकित आर्य हा तत्कालीन भारतीय जनता पक्षाचे (भाजप) नेते विनोद आर्य यांचा मुलगा आहे, ज्यांना हे प्रकरण उघडकीस येताच पक्षातून काढून टाकण्यात आले होते. हे प्रकरण उघडकीस आल्यानंतर, स्थानिक लोक रस्त्यावर उतरले होते. लोकांना शांत करण्यासाठी राज्य सरकारला त्याची चौकशी करण्यासाठी एक विशेष तपास पथक स्थापन करावे लागले होते.

मारेकऱ्यांनी जीवन नरक बनवले आहे: आईचा टाहो 

१ यावेळी अंकिताची आई सोनी देवी यांना अश्रू अनावर झाले. मारेकऱ्यांना फाशीची शिक्षा मिळावी, यासाठी मोठी लढाई लढायची आहे. कोणत्याही मुलीवर अत्याचार करण्यापूर्वी लोकांना विचार करायला भाग पाडले गेले पाहिजे. 

२ रडत रडत त्या म्हणाल्या की, मारेकऱ्यांनी मुलीचे वाईटच केले नाही तर तिचे जीवन नरक बनवले आहे. मुलगी गमावल्याचं दुःख फक्त आईच समजू शकते, असे त्या म्हणाल्या.