Air India Plane crash pilot sumit Sabharwal News: अहमदाबादमधील सरदार वल्लभभाई पटेल विमानतळावरून उड्डाण केल्यानंतर एअर इंडियाचे ड्रीमलायनर विमान कोसळले. ते कशामुळे पडले, या प्रश्नाभोवती सध्या चर्चा सुरू आहेत. वेगवेगळी कारणे, तर्क सांगितले जात आहेत. याच अपघाताच्या घटनेत नवीन माहिती समोर आली आहे, ज्यातून अपघाताचे कारण कळण्यास मदत होऊ शकते. विमान पडण्यापूर्वी वैमानिक सुमित सभरवाल यांनी एटीसी अर्थात हवाई वाहतूक नियंत्रण कक्षाला मेसेज पाठवला होता. त्यात त्यांनी विमान जमिनीच्या दिशेने जात असल्याचे कारण सांगितले होते.
'लोकमत'चं WhatsApp चॅनल फॉलो करा!
अहमदाबाद विमानतळाच्या धावपट्टीवरून उड्डाण केल्यानंतर विमान काही क्षणात बीजे मेडिकल कॉलेजच्या वसतिगृहाच्या इमारतीवर कोसळले. त्यानंतर मोठा स्फोट झाला आणि आगीच्या लोळांनी संपूर्ण परिसर कवेत घेतला. या घटनेत आतापर्यंत २७५ लोक मरण पावले आहेत.
विमान का पडले? पायलट सुमित सभरवाल याचा मेसेज काय?
उड्डाण केल्यानंतर अवघ्या काही सेंकदातच विमान पुन्हा जमिनीच्या दिशेने येऊ लागले. याच दरम्यान, सुमित सभरवाल यांनी हवाई नियंत्रण कशाला एक मेसेज पाठवला होता. ४ ते ५ सेंकदाच्या मेसेजमध्ये विमान खाली येण्याबद्दल त्यांनी माहिती दिली होती.
पायलट सुमित सभरवाल यांनी हवाई नियंत्रण कक्षाला मेसेज केला की, मेडे मेडे मेडे... नो थ्रस्ट, लुजिंग पावर, अनेबल टू लिफ्ट. विमानाला समोर जाण्यासाठी पुरेशी शक्ती मिळत नाही. शक्ती कमी होत आहे. विमान वर उचलता येत नाहीये, असा मेसेज सुमित सभरवाल यांनी हवाई नियंत्रण कक्षाला पाठवला होता.
नो थ्रस्ट म्हणजे काय, ज्याबद्दल सुमित सभरवालांनी माहिती दिली?
पायलट सुमित सभरवाल यांनी उल्लेख केलेला नो थ्रस्ट (No Thrust) म्हणजे इंजिन किंवा एखाद्या वाहनाच्या यंत्रणेमध्ये थ्रस्ट अर्थात पुढे ढकलण्याची शक्ती नसणे.
एखाद्या वस्तूला (विमानाला) पुढे ढकलण्यासाठी जी प्रचंड ताकद लागते त्याला थ्रस्ट असे म्हणतात.. "नो थ्रस्ट" म्हणजे विमानाच्या इंजिनांमध्ये पुढे जाण्यासाठी कोणतीही शक्ती (थ्रस्ट) तयार होत नाहीये. इंजिन प्रचंड शक्ती निर्माण करते, जी विमानाला पुढे ढकलते, ज्यामुळे विमान हवेतून उडू शकते आणि वेगही वाढवता येतो.
वाचा >>एअर इंडियाच्या सर्व बोईंग ७८७ विमानांची होणार तपासणी; डीजीसीएने घेतला मोठा निर्णय
आता जर नो थ्रस्ट परिस्थिती निर्माण झाली असेल, तर त्याची कारणे अशी असू शकतात. पहिले म्हणजे इंजिन सुरू नसतील किंवा फक्त सुरू आहेत, पण पुढे ढकलण्यासाठी लागणारी ऊर्जा त्यात तयार होत नसेल.
दुसरं म्हणजे विमानाला पुढे जाण्यासाठी आवश्यक असलेली शक्ती मिळत नाही. त्यामुळे विमान उडू शकत नाही किंवा हवेत वेगाने पुढे जाऊ शकत नाही. हे इंजिनातील तांत्रिक समस्येमुळे, इंधन नसलं किंवा इंजिन बंद केल्यामुळे होऊ शकतं.