अहमदाबाद विमान अपघातातील मृतांचा आकडा वाढला; डॉक्टर, विद्यार्थी, नातेवाईकांचे मृतदेह सापडले

अहमदाबाद विमान अपघातातील मृतांच्या संख्येमध्ये आणखी वाढ झाली आहे.

Ahmedabad Plane Crash: अहमदाबादमध्ये गुरुवारी एअर इंडियाचे बोईंग ७८७ ड्रीमलायनर एआय-१७१ विमान कोसळून भीषण अपघात झाला होता. या विमानात एकूण २४२ जण प्रवास करत होते. अहमदाबादवरुन लंडनला जाण्यासाठी उड्डाण घेतले असताना काही मिनिटांतच ते कोसळले. मात्र आता अहमदाबाद विमान अपघातातील मृतांची संख्या २७४ वर पोहोचली आहे. प्रवाशांव्यतिरिक्त स्थानिक लोकांचाही मृतांमध्ये समावेश आहे. अपघातस्थळी ढिगारा काढण्याचे काम अजूनही सुरू आहे. शुक्रवारी सकाळपर्यंत २६५ जणांचा मृ्त्यू झाल्याचे सांगण्यात येत होतं. मात्र आता हा आकडा वाढल्याने आणखी धक्का बसला आहे.

गुजरातमधील अहमदाबाद विमानतळाजवळ गुरुवारी झालेल्या एअर इंडियाच्या विमान अपघातातील मृतांची संख्या २७४ वर पोहोचली आहे, तर स्थानिकांमध्ये ३३ जण मृत्यूमुखी पडले आहेत. टाइम्स ऑफ इंडियाच्या वृत्तानुसार शुक्रवारी विमानाचा ढिगारा बाहेर काढणाऱ्या बचाव पथकांना क्रॅश झालेल्या ७८७-८ ड्रीमलाइनर विमानाचा ब्लॅक बॉक्स आणि आणखी २९ मृतदेह सापडले. त्यामुळे मृतांचा आकडा २७४ वर पोहोचला. या अपघातात मृत्युमुखी पडलेल्या प्रवाशांची आणि क्रू मेंबर्सची संख्या २४१ हून अधिक झाली आहे. तर इतर ३३ जण हे अहमदाबादच्या बीजे मेडिकल कॉलेजच्या कॅम्पसमधील डॉक्टर, त्यांचे कुटुंबीय, वैद्यकीय विद्यार्थी, कर्मचारी आणि मेघनीनगर परिसरातील लोक असल्याचे म्हटलं जात आहे.

मृतांमध्ये १० डॉक्टर आणि त्यांच्या नातेवाईकांचा समावेश आहे. विमानाचा ढिगारा काढण्याचे काम रात्रभर सुरू आहे. या कामात १०० हून अधिक कामगार आणि ४० इंजिनिअर गुंतले आहेत. तपास अधिकाऱ्यांना अपघातानंतर २८ तासांनी बीजे मेडिकल कॉलेज कॅम्पसमधील विद्यार्थ्यांच्या मेसच्या छतावर ब्लॅक बॉक्स सापडला. त्यामुळे आता अपघाताचे नेमके कारण समजण्यास मदत होणार आहे. अपघाताचा सर्वाधिक फटका बसलेल्या कॅम्पस इमारती आणि जवळपासच्या भागात रात्रीच्या वेळी शोध मोहिमा राबवण्यात येत आहे. मृतांची ओळख पटविण्यासाठी डीएनए मॅचिंगसाठी ३१९ मृतदेहांचे अवयव पाठवल्याची माहिती अधिकाऱ्यांनी दिली.

दरम्यान, विमानातील २४१ जणांच्या व्यतिरिक्त मृतांमध्ये तीन डॉक्टर आणि एका गर्भवती महिलेचा समावेश होता. ती गर्भवती महिला न्यूरोसर्जरी करणाऱ्या डॉक्टरची पत्नी होती. चौथा मृतदेह एमबीबीएसचा विद्यार्थी जय प्रकाश चौधरी याचा आहे. तो बेपत्ता झाल्याची तक्रार नोंदवण्यात आली होती. शुक्रवारी कुटुंबियांनी जय प्रकाशचा मृतदेह ओळखला.