Plane Crash prediction in marathi magazine: अहमदाबादहून लंडनला निघालेले विमान गुरुवारी दुपारी दीडच्या सुमारास टेकऑफ घेतल्यावर लगेचच कोसळले ( Ahmedabad Plane Crash ) आणि मोठी दुर्घटना घडली. हे विमान अवघ्या तीन मिनिटांत एक मेडिकल कॉलेजच्या हॉस्टेलवर जाऊन आदळले. त्यामुळे विमानातील प्रवासी आणि हॉस्टेलमध्ये तेव्हा उपस्थित असलेले लोक यांचाही मृत्यू झाला. एअर इंडियाचे ( Air India ) बोईंग ७८७ ड्रीमलाइनर विमान एआय-१७१ असे हे विमान होते. अपघातात आतापर्यंत २६५ जणांचा मृत्यू झाला आहे. अशी एखादी मोठी विमान दुर्घटना होईल, अशी भविष्यवाणी अॅस्ट्रो शर्मिष्ठा (Astro Sharmistha) नावाच्या एक्स हँडलवरून करण्यात आली होती. त्याच पार्श्वभूमीवर आता एका मराठी दिवाळी अंकातील भविष्यवाणीचा फोटोही व्हायरल होत आहे. या दिवाळी अंकात केवळ विमान अपघाताबद्दलच नव्हे तर मोठी युद्धे होण्याबाबतचाही अचूक अंदाज वर्तवण्यात आला आहे.
मराठी दिवाळी अंकात नेमके काय?
विमान अपघाताच्या पार्श्वभूमीवर सध्या एका मराठी दिवाळी विशेषांकाचा फोटो व्हायरल होतो आहे. या फोटोत हा दिवाळी विशेषांक २०२४ मधील असल्याचे दिसते. यातील पान क्रमांक २७३ वर श्री. सिद्धेश्वर मारटकर यांनी भविष्याचा अंदाज वर्तवला आहे. त्यानुसार, मे आणि जून २०२५ या काळात मोठी युद्धे, स्फोटक घटना, अपघात किंवा घातपात शक्य असल्याची भविष्यवाणी करण्यात आली होती. या भविष्यावाणी विस्तृत अंदाज व्यक्त करताना शेवटच्या परिच्छेदात विमान अपघात होण्याची शक्यता वर्तवण्यात आली होती. शेवटच्या परिच्छेदात लिहिले आहे की- 'शनी मंगळाचा षडाष्टक योग मोठ्या युद्धासाठी पोषक असून काही देश युद्धाच्या उंबरठ्यावर उभे असतील. या योगामुळे मोठे अपघात / घातपात / अतिरेकी कारवाया / गूढ मृत्यू यातून मोठी हानी संभवते. मोठे विमान अपघात किंवा हवाई हल्ले यातून मोठी हानी संभवते. क्षेपणास्त्रांचा मोठ्या प्रमाणावर वापर होईल. सरकारी कर्मचारी, डॉक्टर यांचे संप, बंद या काळात संभवतात.' सध्या या मराठी दिवाळी विशेषांकाचा फोटो व्हायरल होताना दिसत आहे.
दरम्यान, अॅस्ट्रो शर्मिष्ठा (Astro Sharmistha) नावाच्या हँडलवरूनही भविष्यवाणी करण्यात आली होती. गेल्या वर्षी २९ डिसेंबर २०२४ ला तिने पुढील वर्षासाठीची (२०२५ साठी) भविष्यवाणी केली होती. त्यात तिने भारतीय हवाई क्षेत्राबाबतही भविष्यवाणी केली होती. यात एका मोठ्या विमान अपघाताची शक्यता असल्याचे म्हटले होते. तिची पोस्ट तिने पुन्हा ५ जूनला रिपोस्ट करत मी आजही विमान अपघाताची शक्यता असल्याचे सांगत असल्याचे म्हटले होते. आणि दुर्दैवाने अवघ्या सात-आठ दिवसांत तिची ही भविष्यवाणी खरी ठरली.