रोज विमाने उडतात, पण या विमानातून आवाजच येत नव्हता...; व्हिडीओ काढणाऱ्या तरुणाच्या काकीला वाटले...

Air India plane crash video:आर्यनने हा व्हिडिओ नेमका का आणि कसा काढला याची माहिती पोलीस घेत आहेत. विमान अपघातामागे घातपाताची काही लिंक आहे का हे देखील तपासले जात आहे.

अहमदाबाद विमान अपघाताचा जो व्हिडीओ व्हायरल झालेला तो आर्यन नावाच्या एका तरुणाने काढला होता. तो आपल्या नातेवाईकांकडे आला होता. त्याने पहिल्यांदाच विमान एवढ्या जवळून पाहिले होते. तो ज्या नातेवाईकांकडे आला होता त्याच्या घरावरून तर रोजच विमाने उडत होती. यामुळे त्यांना विमान नवीन नव्हते, परंतू मुलांनी या विमानाला आवाजच नसल्याचे म्हटले आणि सगळे टेरेसवर धावले, असे प्रत्यक्षदर्शी महिलेने सांगितले. 

आर्यनने हा व्हिडिओ नेमका का आणि कसा काढला याची माहिती पोलीस घेत आहेत. विमान अपघातामागे घातपाताची काही लिंक आहे का हे देखील तपासले जात आहे. आर्यन हा १७ वर्षांचा आहे आणि १२ वी मध्ये शिकतो. तो ज्या पाहुण्यांकडे आला होता त्यांचे घर विमानतळाला लागूनच आहे. काही काही मिनिटाला विमाने उडत असतात, त्यांचे मोठे आवाज येत असतात. यामुळे त्यांना आता त्याची सवय झाली होती. 

ज्या घराच्या छतावरून हे विमान गेले त्या घरात राहणाऱ्या महिलेने सांगितले की, त्या दिवशी एअर इंडियाच्या विमान AI 171 मधून येणारा आवाज पूर्णपणे वेगळा होता. विमान उडत आहे असे वाटत नव्हते. हे विमान खूप जवळून जात आहे, त्यातून कोणताही आवाज येत नाही, असे माझ्या मुलांनी सांगितले आणि ते धावत छतावर गेले. मुले छतावर आली आणि विमान पाहू लागली. त्यावेळी आर्यनही तिथे होता आणि त्याने व्हिडिओ बनवायला सुरुवात केली. आर्यन पहिल्यांदाच येथे आला होता. त्याने तो व्हिडिओ त्याच्या मित्रांना दाखवण्यासाठी बनवला. त्याचा उद्देश त्याच्या मित्रांना विमान किती जवळून जाते हे सांगणे होता. पण काही वेळाने विमान कोसळले, सर्वत्र धूर पसरला, असे या महिलेने सांगितले.