Video: ५ दिवसांपूर्वीच झाला साखरपुडा; दुकानात बोलता बोलता युवकाला आला हार्ट अटॅक

अचानक घडलेला हा प्रकार दुकानात लावलेल्या सीसीटीव्ही कॅमेऱ्यात कैद झाला.

सूरत - काही दिवसांपूर्वीच साखरपुडा झाला होता, घरात लग्नाची तयारी सुरू होती. त्यातच गुजरातमध्ये एका कुटुंबाच्या या आनंदावर विरजण पडले आहे. गुजरातच्या सूरतमध्ये घडलेल्या या घटनेने अनेकांना व्यथित केले आहे. याठिकाणी ऋषभ गांधी नावाच्या २७ वर्षीय युवकाचा हृदयविकाराच्या झटक्याने मृत्यू झाला आहे. ऋषभ त्याच्या टेक्सटाइलच्या दुकानात नेहमीप्रमाणे काम करत बसला होता. त्याचवेळी अचानक त्याला हार्ट अटॅक आला आणि घटनास्थळीच त्याचा मृत्यू झाला. या घटनेचा व्हिडिओ दुकानातील सीसीटीव्ही कॅमेऱ्यात कैद झाला.

ऋषभ मूळचा जोधरूरच्या चांदपोल भागात राहणारा होता. माहितीनुसार, गुरुवारी संध्याकाळी ऋषभ दुकानावर त्याचे दाजी आणि मित्र यांच्यासोबत बोलत बसला होता. त्यावेळी ऋषभला तहान लागली तेव्हा समोरील पाण्याच्या बॉटलचं झाकण उघडून त्याने पाणी पिण्याचा प्रयत्न केला परंतु त्याच्या हातापायाने काम करणे बंद केले आणि बसल्या जागीच तो खाली कोसळला. अचानक घडलेला हा प्रकार दुकानात लावलेल्या सीसीटीव्ही कॅमेऱ्यात कैद झाला.

સુરતમાં રહેતા 27 વર્ષીય ઋષભ ગાંધીની સગાઈ 5 દિવસ પહેલા જ થઈ હતી, ખુરશી પર બેઠા બેઠા હાર્ટ અટેક આવતા તરત મોત નિપજ્યું.

સુરતમાં યુવકના મોતના લાઈવ સીસીટીવી સામે આવ્યા. #Suratpic.twitter.com/Uf3cz1wVSg

— Sagar Patoliya (@kathiyawadiii) June 6, 2025

ऋषभची अवस्था पाहून त्याच्या दाजी आणि मित्रांनी त्याला सीपीआर देणे सुरू केले. परंतु ऋषभने काहीच प्रतिसाद दिला नाही. त्यानंतर खुर्चीवरच बसवून त्याला पार्किंगपर्यंत आणले गेले. या गोंधळात ऋषभला जवळच्या रुग्णालयात उपचारासाठी नेण्यात आले परंतु तिथे डॉक्टरांनी त्याला मृत घोषित केले. ऋषभ गांधी याच्या मृत्यूचं कारण हार्ट अटॅक असल्याचे सांगितले गेले. या घटनेने ऋषभच्या कुटुंबाला मोठा धक्का बसला आहे. ऋषभचं अंत्यसंस्कार त्याच्या राजस्थानच्या मूळ गावी करण्यात येणार आहे. मृत ऋषभ बहिणीसोबत इथे गुजरातला राहत होता तर त्याचे आई वडील गावात राहायचे. गुजरातमध्ये त्याने मित्र आणि नातेवाईकांसोबत मिळून टेक्सटाईल मार्केटमध्ये कपड्याचे दुकान सुरू केले होते.

हार्ट अटॅक येण्याआधीच ओळखा धोका

भारतात हृदयरोगांचा धोका दिवसेंदिवस वाढतच चालला आहे. हृदयरोगाच्या मुख्य कारणांमध्ये डायबिटीस, हायपरटेंशन इत्यादींचा समावेश आहे. स्मोकिंग, हाय ब्लड प्रेशर, हाय कोलेस्टेरॉल, डायबिटीस, लठ्ठपणा यांसारख्या स्थिती हार्ट ब्लॉकेजचा धोका अधिक वाढवतात. तेच हार्ट ब्लॉकेजच्या सुरूवातीच्या लक्षणांमध्ये छातीत वेदना, श्वास घेण्यास त्रास, थकवा, डोकेदुखी, चक्कर येणे, बेशुद्ध पडणे, कमजोरी आणि थंडी लागणे इत्यादींचा समावेश आहे. नॉर्मल हार्ट रेट एका मिनिटात 60 ते 100 असतं. जर यात बदल होत असेल तर याचा हार्ट हेल्थवर वाईट प्रभाव पडू शकतो.