हैदराबाद - तेलंगणामधील मराठमोळे आयपीएस अधिकारी आणि तेलंगणातील रचकोंडाचे पोलीस आयुक्त महेश भागवत यांनी आपल्या सोशल मीडिया अकाऊंटवरुन एक फोटो शेअर केला आहे. या फोटोत टाटा उद्योग समुहाचे प्रमुख रतन टाटा यांच्याशी हस्तांदोलन करताना ते दिसत आहे. मात्र, या फोटोसह लिहिण्यात आलेले कॅप्शन अनेकांसाठी प्रेरणादायी आणि मराठी माणसांसाठी अभिमानास्पद आहे. तसेच रतन टाटा यांना भेटून अत्यानंद झाल्याचे महेश भागवत यांनी म्हटले आहे. तब्बल 25 वर्षांनंतर ही महेश भागवत हे हमने टाटा का नमक खाया है... असे भावनिक होऊन म्हणतात.
महेश मुरलीधर भागवत हे मूळचे अहमदनगर जिल्ह्यातील पाथर्डी गावचे आहेत. शिक्षक वडिलांच्या या मुलाने सिव्हील इंजिनिअरींगचे शिक्षण घेतले होते. याच काळात म्हणजे 1993-94 मध्ये महेश भागवत हे पुण्यातील टाटा मोटार्स या कंपनीत कामाला होते. कधीकाळी टाटा मोटर्समध्ये काम करणाऱ्या या तरुणाला, आपण भविष्यात टाटा मोटार्सचे मालक रतन टाटा यांना भेटू, असे स्वप्नातही वाटले नव्हते. मात्र, आपल्या जिद्दीच्या आणि मेहनतीच्या जोरावर महेश भागवत यांनी आयपीएस परीक्षा पास केली. त्यानंतर, गेल्या अनेक वर्षांपासून ते आंध्र प्रदेशमध्ये कार्यरत आहेत. विशेष म्हणजे तेलंगणा राज्य निर्मित्ती झाल्यानंतर त्यांना तेलंगणाची जबाबदारी देण्यात आली आहे. त्यामुळे ते आयपीएस म्हणून तेलंगणातच कार्यरत आहेत. विशेष म्हणजे महिला आणि बाल तस्करीविरुद्ध महेश भागवत यांनी उल्लेखनीय कामगिरी केली आहे. महेश भागवत हे गेल्या 13 वर्षांपासून मानवी तस्करीविरोधात लढत आहेत. या तेरा वर्षांमध्ये आंध्र प्रदेश आणि तेलंगणात त्यांनी व त्यांच्या पथकासोबत शेकडो बालमजुरांची सुटका केली. शिवाय तेथील देहविक्री व्यवसायदेखील बंद केलेत.
दरम्यान, गेल्या आठवड्यात महेश भागवत यांनी जुनी आठवण म्हणून हा फोटो सोशल मीडियावर शेअर केला असून या फोटोवर अतिशय चांगल्या कमेंट मिळाल्या आहेत. त्यापैकी एका कमेंटमध्ये दोन्ही महान व्यक्तींच्या हातमिळवणीतील नम्रता सर्वकाही सांगून जाते, असे म्हटले आहे.