मालेगाव (नाशिक) : मालेगावी चित्रपटगृहामध्ये दिवाळीनिमित्त सलमान खानचा नवीन चित्रपट प्रदर्शित झाला असता, रविवारी रात्रीच्या शोमध्ये काही अज्ञात व्यक्तींनी मोठ्या प्रमाणावर फटाके फोडत धुडगूस घातला. या प्रकाराने चित्रपटगृहामध्ये घबराट पसरली. शहरातील मोहन चित्रपटगृहात उत्साही प्रेक्षकांनी मोठमोठे भुईनळे व इतर उंचावर फुटणारे फटाके फोडले. अचानक फोडलेल्या या फटाक्यांमुळे चित्रपटगृहामध्ये एकच गोंधळ उडाला. अनेकांच्या अंगावर फटाके उडाल्याने काहींनी भीतीने काढता पाय घेतला.
सलमान खानकडून नाराजी
सिनेमागृहात फटाके फोडण्याच्या घटनेचा व्हिडीओ सोशल मीडियाच्या माध्यमातून मोठ्या प्रमाणात व्हायरल झाला असून, काही महिन्यांपूर्वी अशीच घटना घडली होती. त्यावेळी खुद्द सलमान खानने नाराजी व्यक्त करून असे प्रकार करू नयेत, असे आवाहन सोशल मीडियावर केले होते.
हे भयानक आहे ‘टायगर ३’ हा चित्रपट पाहताना मालेगावच्या थिएटरमध्ये फटाक्यांची आतषबाजी केल्याचे समजले. हे भयानक आहे. आपण किंवा इतरांना धोका न पोहोचवता चित्रपटाचा आनंद घ्या आणि सुरक्षित राहा. - सलमान खान, अभिनेता