पतीची निधन वार्ता ऐकताच अर्धांगिनीनेही सोडले प्राण!

दाम्पत्याचे निधन एकाच दिवशी झाल्याने या हृदयद्रावक घटनेबाबत हळहळ व्यक्त होत आहे.

भगवान देवरे

उमराणे (जि. नाशिक) : येथील वारकरी संप्रदायातील हिरामण पंढरीनाथ देवरे (६९) यांचा सोमवार (दि. १६) दुपारी एक वाजता उपचारादरम्यान मृत्यू झाला. त्यांच्या मृत्यूची बातमी ऐकताच त्यांच्या पत्नी विमलबाई पंढरीनाथ देवरे ( ६४) यांचेही हृदयविकाराच्या तीव्र झटक्याने निधन झाले. दाम्पत्याचे निधन एकाच दिवशी झाल्याने या हृदयद्रावक घटनेबाबत हळहळ व्यक्त होत आहे.

हिरामण देवरे यांना मूत्राश्मरीचा त्रास असल्याने नाशिक येथील खासगी दवाखान्यात त्यांना शस्त्रक्रियेसाठी दाखल करण्यात आले होते. या दरम्यान त्यांचा हृदयविकाराच्या झटक्याने मृत्यू झाला. हे वृत्त त्यांची पत्नी विमलबाई देवरे यांच्या कानावर पडताच त्यांचीही तब्येत अत्यवस्थ होऊन हृदयविकाराच्या तीव्र झटक्याने त्यांचेही निधन झाले.

त्यांना सायंकाळी सहा वाजता एकाचवेळी अग्नीडाग देण्यात आला. त्यांच्या पश्चात मुलगी, दोन मुले, सुना व नातवंडे असा परिवार आहे. दरम्यान, नवरा व बायको यांचे एकाच दिवशी निधन झाल्याने उमराणेसह परिसरातील नागरिकांकडून हळहळ व्यक्त करण्यात येत आहे.