नाशिक : दिंडोरी - उमराळे रोडवर अवैध मद्याची वाहतूक करणा-या बोलेरो वाहनासह पाच लाख ३१ हजार ८८८ रुपयांचे देशी-विदेशी मद्य मद्याचे बॉक्स ग्रामीण पोलिसांच्या स्थानिक गुन्हे शाखेने सोमवारी (दि़१२) मध्यरात्री जप्त केले़ या मद्याची वाहतूक करणारे संशयित किशोर मोतीराम खांडवी (रा. रासेगाव, ता.दिंडोरी) व त्याचा साथीदार गोपी नागरे (रा. क्रांतीनगर, नाशिक) या दोघांना अटक करण्यात आली आहे़
ग्रामीण पोलीस अधीक्षक संजय दराडे यांच्या आदेशानुसार जिल्ह्यातील अवैध मद्याची वाहतूक, विक्री तसेच हातभट्टीची दारू तयार करणा-यांवर छापेमारी सुरू आहे़ स्थानिक गुन्हे शाखेच्या पथकातील अधिकारी व कर्मचारी सोमवारी (दि़१२) मध्यरात्री दिंडोरी पोलीस ठाणे हद्दीत गस्त घालीत होते़ पोलीस निरीक्षक अशोक करपे यांना पेठ-दिंडोरी रस्त्याने देशी - विदेशी मद्याची वाहतूक केली जात असल्याची माहिती माहिती मिळाली़ त्यानुसार पोलीस उपनिरीक्षक मच्छिंद्र रणमाळे, पोलीस हवालदार दिपक आहिरे, दत्तात्रय साबळे, पुंडलीक राउत, गणेश वराडे, अमोल घुगे, विश्वनाथ काकड यांच्या पथकाने दिंडोरी हद्दीतील उमराळे - दिंडोरी रोडवर सापळा रचला.
स्थानिक गुन्हे शाखेच्या पथकास मिळालेल्या माहितीनुसार त्यांनी हिरव्या रंगाची बोलेरो कार (एम.एच.०४.डी.एन.१३२५) अडवून तपासणी केली असता त्यामध्ये २ लाख ३१ हजार ८८८ रूपयांचा देशी-विदेशी मद्याचा अवैध मद्यसाठा आढळुन आला. पोलिसांनी बोलेरो व मद्यसाठा असा ५ लाख ३१ हजार ८८८ रूपयांचा मुद्देमाल जप्त करून चालक खांडवी व त्याचा साथीदार नागरे या दोघांना अटक केली़ या दोघांवर दिंडोरी पोलीस ठाण्यात मुंबई दारूबंदी कायद्यान्वये गुन्हा दाखल करण्यात आला आहे़