मुंजवाड ते तिळवण रस्त्यावर अपघातात वाढ

खमताणे : मुंजवाड ते तिळवण या सात कि.मी. अंतराच्या रस्त्याची दुरवस्था झाली असून ठिकठिकाणी खड्डे पडले आहेत. वाहतुकीला प्रचंड त्रास होत असून अपघाताचे प्रमाण वाढले आहे. त्यामुळे संबंधित प्रशासनाने याकडे लक्ष द्यावे, अशी मागणी उपसरपंच शिवनाथ पवार व ग्रामस्थांनी केली आहे.

मुंजवाड ते तिळवण रस्ता ग्रामस्थांसाठी सोयीचा असल्याने या रस्त्यावर मोठ्या प्रमाणात वर्दळ असते. या रस्त्यावर खड्ड्यांचे प्रमाण वाढल्याने वाहनांचे नुकसान होत असून वाहनचालकांमध्ये भांडणाचे प्रमाण वाढले आहे. तसेच शेतकऱ्यांकडून प्रशासनाची परवानगी न घेता डांबर फोडून पाइपलाइनसाठी चाऱ्या केल्या जात आहेत. त्यामुळेही रस्त्याचे नुकसान होत आहे, प्रशासनाने याकडे लक्ष द्यावे, अशी मागणी ग्रामस्थांकडून केली जात आहे.