लोकमत न्यूज नेटवर्क
इगतपुरी : सह्याद्री नगर (पांढरपूरवाडी) येथील केंद्रीय राखीव पोलीस दलाचे वीर जवान सचिन चिकणे यांचे मंगळवारी कर्तव्यावर असताना दुर्दैवी निधन झाले. त्यांच्यावर बुधवारी (दि.१) शासकीय इतमामात अंत्यसंस्कार करण्यात आले. यावेळी
‘वीर जवान सचिन चिकणे अमर रहे' चा जयघोष करण्यात येत होता, त्यामुळे शोकाकुल वातावरणात हजारो नागरिकांच्या उपस्थितीत अंत्यसंस्कार करण्यात आले.
प्रथमतः वीर जवान सचिन चिकणे यांच्या पार्थिवास केंद्रीय राखीव पोलीस दलाच्या जवानांनी मानवंदना देऊन पुष्पचक्र अर्पण केले. तत्पूर्वी सचिन यांचे पार्थिव घरी आणण्यात आले होते. कुटुंबीय आणि नातेवाइकांनी अंत्यदर्शन घेतले. त्यानंतर फुलांनी सजवलेल्या वाहनातून शोकाकुल वातावरणात अंत्ययात्रा काढण्यात आली.
इगतपुरीच्या अमरधाम येथे त्यांना पोलीस दल व केंद्रीय राखीव पोलीस दलातर्फे मानवंदना देण्यात आली. त्यानंतर त्यांच्या पार्थिवास त्यांचे मोठे बंधू सुनील चिकणे यांनी अग्नी डाग दिला.
वीर जवान सचिन चिकणे यांच्यामागे आई, पत्नी,दोन मुली, बहीण, दोन भाऊ असा परिवार आहे.
(०१ इगतपुरी जवान)
इगतपुरीचे वीर जवान सचिन चिकणे यांच्या पार्थिवास शासकीय इतमामात मानवंदना देताना उपस्थित जनसमुदाय.