Chhagan Bhujbal Maharashtra News: रायगड आणि नाशिकच्या पालकमंत्रिपदाचा विषय सातत्याने चर्चेत आहे. नाशिकमध्ये कुंभमेळा होणार आहे, त्यामुळे पालकमंत्र्यांची नियुक्ती आणि महायुतीत कोणाकडे पालकमंत्रिपद जाणार, याबद्दल राजकीय वर्तुळात उत्सुकताही आहे. छगन भुजबळ मंत्री झाल्याने वरिष्ठ मंत्री म्हणून त्यांच्याकडे पालकमंत्री पद जाईल, अशा चर्चा सुरू झाल्या. पण, भुजबळांनीच आता रस नसल्याचे म्हटले आहे.
'लोकमत'चं WhatsApp चॅनल फॉलो करा!
नाशिक दौऱ्यावर आले असता त्यांनी माध्यमांशी संवाद साधला. नाशिक शहरातील वाहतूक व्यवस्थेची पाहणी करत असताना छगन भुजबळ यांनी पालकमंत्रिपदाबद्दल भाष्य केले.
'सिंहस्थापूर्वी कामे मार्गी लागणे महत्त्वाचे आहे, त्यासाठी पालकमंत्रिपदच हवे असे नाही. आणि पालकमंत्रिपदासाठी आपला हट्टही नाही', असे वक्तव्य अन्न व नागरी पुरवठा मंत्री छगन भुजबळ यांनी केले.
वाचा >>सांगलीत काँग्रेसला मोठा धक्का; जयश्रीताईंना पालकमंत्री भेटले, भाजप प्रवेशाचे ठरले
मंत्री भरत गोगावले यांनी उद्धव ठाकरे यांच्या शिवसेनेतील निर्णयप्रक्रियेविरोधात केलेल्या वक्तव्याबाबत बोलताना भुजबळ म्हणाले, 'आमच्या काळात सर्व निर्णय बाळासाहेब ठाकरे हेच घ्यायचे आता कोण घेते ते माहीत नाही.
'मी सेनेतून बाहेर पडल्यानंतर पुन्हा तिथे जाण्याचा प्रश्न नव्हता. त्यामुळे माझा प्रवेश कोणामुळे थांबला, या वक्तव्याला महत्त्व नाही', असेही भुजबळ यावेळी म्हणाले.
पालकमंत्री नियुक्तीबद्दल सस्पेन्स कायम?
मंत्रिपद मिळाल्यानंतर पालकमंत्रिपदाची जबाबदारी सोपविली जाईल, असा अंदाज बांधला जात होता. मात्र दरम्यानच्या काळात कुंभमेळ्याच्या बैठकीच्या निमित्ताने नाशिकमध्ये मुख्यमंत्री देवेंद्र फडणवीस यांनी पालकमंत्री नसला तरी कुंभमेळा मंत्री आहे, ते कमी पडले तर आम्ही आहोतच असे सांगून एकप्रकारे पालकमंत्री नेमला जाणार नसल्याचे संकेत दिले होते.