गॅसचा काळाबाजार उघड, पाच वाहनांसह ४५७ सिलिंडर जप्त

टंचाईवर मात करत घरगुती गॅस सिलिंडरचा पुरवठा सुरळीत ठेवण्यासाठी विविध निर्बंध आणून प्रशासनाकडून प्रयत्न केले जात आहेत. कोणीही काळाबाजार, अवैध साठा करू नये, असे स्पष्ट आदेश जिल्हाधिकारी यांनी कंपन्यांना दिले आहेत.

नाशिक : सातपूर एमआयडीसी भागात एका गॅस एजन्सीचा काळाबाजार समोर झाला आहे. घरगुती गॅस सिलिंडर एका ट्रकमधून दुसऱ्या मालवाहू वाहनांमध्ये भरून अवैधरित्या वाहतूक करण्याच्या प्रयत्नात असताना नाशिक जिल्हा प्रशासनाच्या पथकाने धाड टाकून पाच वाहनांसह ४५७ सिलिंडर जप्त केले. त्यात घरगुती वापराचे एचपीसीएलचे १५८, पाच किलो वजनाचे भरलेले दहा व २८९ रिकाम्या सिलिंडरचा समावेश आहे. एकूण २५ लाख ७३ हजार ५६८ रुपये किमतीचा मुद्देमाल जप्त करण्यात आला आहे.

 टंचाईवर मात करत घरगुती गॅस सिलिंडरचा पुरवठा सुरळीत ठेवण्यासाठी विविध निर्बंध आणून प्रशासनाकडून प्रयत्न केले जात आहेत. कोणीही काळाबाजार, अवैध साठा करू नये, असे स्पष्ट आदेश जिल्हाधिकारी यांनी कंपन्यांना दिले आहेत. तरीही गॅस सिलिंडरचा काळाबाजार सुरू असल्याची माहिती प्रशासनाला मिळाली होती. त्यावरून ही कारवाई करण्यात आली.

संशयित आरोपी
प्रवीण साळुंखे (रा. हेगडेवार चौक, सिडको), समाधान सोळंकी (रा. केवलपार्क, अंबड), रवींद्र खंडाळे (रा. सातपूर), एजन्सी मालक हर्षल सरनाईक (रा. जलालपूर), सिद्धांत निराळे (रा. सिडको), तेजस आढळकर (रा. कामटवाडे), प्रीतम राजपूत (रा. सातपूर), व्ही. प्रताप (रा. शिवाजीनगर).