आर्टिलरी स्कूल : देवळाली गोळीबार मैदानावर तोफांचा ‘सर्वत्र प्रहार’

या युध्दजन्य प्रात्याक्षिकांद्वारे तोफखान्याच्या जवानांनी स्वत:ला पुन्हा सिध्द करत संभाव्य काळात कोणत्याही युध्दाशी मुकाबला करण्यास आधुनिक तोफा घेऊन भारतीय सैन्यदल सज्ज असल्याचा अप्रत्यक्षपणे संदेश दिला.

ठळक मुद्देहोवित्झर आणि वज्रकडून तितक्याच ताकदीने बॉम्बहल्ला अत्याधुनिक ‘स्वाती’ रडार सिस्टिमचेही प्रदर्शन

नाशिक : येथील देवळाली स्कूल आफ आर्टीलरीच्या वार्षिक ‘तोपची’ या युधजन्य प्रात्याक्षिकांच्या निमित्ताने भारतीय सैन्यदलाच्या तोफखाना प्रशिक्षण केंद्राच्या गोळीबार मैदानावर मोर्टारपासून थेट के-९वज्रपर्यंत सर्वच तोफा मोठ्या ताकदीने मंगळवारी (दि.१२) धडाडल्या. भारतीय सैन्याचा पाठीचा कणा मानला जाणारा व युध्दात निर्णायक भूमिका ठरविणाऱ्या तोफखान्याच्या आधुनिक वाटचालीची गतिमानता बघून शत्रू राष्ट्रच्याही उरात धडकी भरली असावी.
अचूक लक्ष्यभेद, काही सेकं दात एकापेक्षा अधिक बॉम्ब डागण्याची क्षमता असलेल्या १३०० एमएम, १०५ एम.एम, उखळी मारा करणारी हलकी तोफ, कारगिल युध्दात शत्रूला सळो की पळो करून सोडणारी १५५ एम.एम बोफोर्स, १३० एम.एम सोल्टम, होवित्झर एम-७७७ आणि के-९ वज्र या अत्याधुनिक तोफांसह मल्टी बॅरल रॉकेट लॉन्चरच्या सहाय्याने प्रशिक्षित जवानांनी दिलेले लक्ष्य निर्धारित मिनिटांत अचूकपणे भेदत तोफखान्याची ताकद दाखवून दिली. होवित्झरने दागलेले पाच बॉम्ब आणि वज्रकडून तितक्याच ताकदीने झालेला बॉम्बहल्ला शत्रूला निश्चित धडकी भरविणारा असाच होता. कारगिलच्या युध्दात पाकिस्तानच्या सैन्याला धूळ चारण्यास यशस्वी ठरलेल्या बोफोर्स प्रकारच्या सहा तोफांनी एकत्रितपणे प्रत्येकी दोन बॉम्ब दागून लक्ष्य उद्ध्वस्त केले. या युध्दजन्य प्रात्याक्षिकांद्वारे तोफखान्याच्या जवानांनी स्वत:ला पुन्हा सिध्द करत संभाव्य काळात कोणत्याही युध्दाशी मुकाबला करण्यास आधुनिक तोफा घेऊन भारतीय सैन्यदल सज्ज असल्याचा अप्रत्यक्षपणे संदेश दिला.
या सोहळ्याला प्रमुख अतिथी म्हणून लेफ्टनंट जनरल वाय.वी. के मोहन अतिविशीष्ट सेवा मेडल, आर्टिलरी स्कूल चे कमान्डंट लेफ्टनंट जनरल रणबिरसिंग सलारिया यांच्यासह भारतीय वायूसेनेचे अधिकारी जवान, विशेष निमंत्रित नेपाळ सैन्याचे अधिकारी व जवानांसह पोलीस अधिकारी या सोहळ्याला उपस्थित होते.
या सोहळ्यादरम्यान युध्दभूमीवर जशी तोफांची भूमिका महत्त्वाची ठरते तसे लढाऊ हेलिकॉप्टरची भूमिकाही तितकीच आवश्यक असते, याचे प्रात्याक्षिकदेखील आर्मी एव्हिएशन ट्रेनिंग स्कूलच्या वैमानिकांनी सादर केले. चेतक, ध्रूव, रूद्र या लढाऊ हेलिकॉप्टरच्या सहाय्याने जवानांनी चित्तथरारक कसरती सादर करुन उपस्थितांच्या डोळ्यांची पारणे फेडली. यावेळी हत्यारांचा शोध घेण-या अत्याधुनिक ‘स्वाती’ रडार सिस्टिमचेही प्रदर्शन करण्यात आले. तोफखान्याकडे असलेल्या अत्याधुनिक साधनसामुग्री बघता भारतीय सैन्यदलाने आधुनिकतेच्या वाटेवर स्वत:ला अधिकाधिक वेगवाने ठेवण्याचा सातत्यपूर्ण प्रयत्न सुरू ठेवल्याचे दिसून येते.
--इन्फो--
गोळीबार मैदानाच्या परिसरातील अशी होती ‘लक्ष्य’
१) कोनहिल टॉप
२) ओपन पॅच
३) बहुला-१
४) बहुला -१ सेंटर
५) हर्बरा
६) व्हाईट टेम्पल एरिया
७) डायमंड
८) रिक्टॅन्गल
९) हम्प
१० संगमाथा ही सर्व ‘लक्ष्य’ तोफांनी अचूकपणे भेदली. होवित्झर, वज्र या तोफा सोहळ्याच्या आकर्षण ठरल्या.