रांझणी : तालुक्याच्या विविध भागांत सध्या पेरणीपूर्व मशागतीच्या कामांना सुरुवात करण्यात आली आहे. यासाठी ९० टक्के शेतकरी ट्रॅक्टरचा वापर करण्यावर भर देणार असून, नांगरटीसाठी भाडोत्री ट्रॅक्टर व्यावसायिकांना संपर्क करत आहेत. या चालकांकडे आधीच तारखा बुक असल्याने, अनेकांना थांबविण्याचे सांगण्यात येत आहे. यंदा चालकांचा व्यवसाय तेजीत आहे.
पातोंडा शिवारात वीजपुरवठा ७ तास खंडित
नंदुरबार : शहरागतच्या पातोंडा गाव शिवारातील विविध रहिवासी वसाहतींमध्ये सुमारे सहा ते सात वीजपुरवठा बंद होता. ऐन अक्षय तृतीयेच्या दिवशीच्या वीज बंद असल्याने नागरिक हैराण झाले होते. पातोंडा केंद्रात झालेल्या बिघाडामुळे वीज खंडित झाली होती.
घर दुरुस्ती सुरू, परंतु साहित्याअभावी फिरफिर
नंदुरबार : जिल्ह्याच्या विविध भागांत पावसाळ्यापूर्वी घर दुरुस्तीची कामे सुरू आहेत. यासाठी प्लास्टीक कागद, काैले, पन्हाळी पत्रे, तसेच इतर साहित्याला मागणी असते, परंतु दुकाने बंद असल्याने त्याची खरेदी करणे जमत नसल्याने, नागरिकांना जुन्याच वस्तूंचा आधार घेत कामे करावी लागत असल्याची माहिती देण्यात आली आहे. ग्रामीण भागात प्लास्टीक नसल्याने मातीच्या धाब्यावर कोरडा चारा वापरत आहेत.
टोप्यांना मागणी
नंदुरबार : शहरात सकाळी ११ वाजेपर्यंत सुरू होणाऱ्या बाजारपेठेत काही व्यावसायिक रुमाल व टोप्यांची विक्री करत आहेत. यातील टोप्यांना मागणी असून, तापमान वाढ झाल्याने त्यांना मागणी आहे. यंदा मालच उपलब्ध झाला नसल्याने गेल्या वर्षातील मालाची विक्री करत असल्याचे विक्रेत्याने सांगितले.
वाहनांचा उपयोग
नंदुरबार : तालुक्यातील, ढेकवद, शनीमांडळ, आष्टे, नटावद, लहान शहादे व कोपर्ली या केंद्रांवर पंचायत समितीकडून चारचाकी वाहने नियुक्त करण्यात आली आहेत. या वाहनांमधून लसीकरणासाठी नागरिकांना आरोग्य केंद्रांपर्यंत आणण्याचे उद्दिष्ट्य देण्यात आले आहे.
मंदाणे येथे लसीकरण शिबिर
नंदुरबार : शहादा तालुक्यातील मंदाणे येथील सर्व व्यावसायिक व त्यांच्याकडे काम करणारे सर्व कर्मचारी यांच्यासाठी १६ मे रोजी कोरोना चाचणी शिबिर घेण्यात येणार आहे. शिबिरात सर्व व्यावसायिकांनी सहभागी होण्याचे सरपंच विजय सनेर, उपसरपंच अनिल भामरे, डॉ.जितेंद्र पाटील, ग्रामविकास अधिकारी दिनेश पाटील, पोलीस पाटील सुभाष भील यांनी केले आहे. चाचणी न करणाऱ्यांवर कारवाई हाेणार आहे.
गावराणी आंबा आवक
नंदुरबार : शहरातील बाजारपेठेत गेल्या दोन दिवसांपासून गावराणी आंबा दिसून येत आहे. तालुक्याच्या ग्रामीण भागातून आदिवासी महिला छोट्या आकाराचे आंबे बाजारात विक्रीसाठी आणत आहेत. यंदा लाॅकडाऊनमुळे याची आवक मात्र कमी राहण्याची शक्यता आहे.
चाचणीला प्रतिसाद
नंदुरबार : शहरात आरोग्य विभागाने लावलेल्या रॅपिड अँटिजन टेस्ट कॅम्पमध्ये नागरिक भेटी देत चाचण्या करून घेत आहेत. या उपक्रमाला सर्वाधिक पसंती असून, वैद्यकीय कारणासाठी बाहेरगावी जाणारे रॅपिड टेस्टवर भर देत असल्याचे दिसून आले आहे.
फेरीवाल्यांचे हाल
नंदुरबार : लाॅकडाऊनमुळे किरकोळ खाद्यपदार्थ विक्रेते तथा फेरीवाल्यांचे व्यवसाय बंद आहेत. यातून त्यांच्या दैनंदिन रोजगारावर परिणाम होत आहे. फेरीवाल्यांच्या घरभाड्यासह इतर अनेक समस्या आहे. फेरीवाल्यांसाठी असलेल्या योजनांची योग्य ती माहिती नसल्याने त्यांचे हाल होत आहेत.
गतिरोधकांची गरज
नंदुरबार : शहरातून जाणाऱ्या शेवाळी-नेत्रंग महामार्ग अर्थात तळोदा रस्त्याचे नूतनीकरण करण्यात आले आहे. नव्याने तयार झालेल्या रस्त्यावर गतिरोधकही काढले गेले आहेत. यामुळे या मार्गावर अपघातांची शक्यता आहे. यामुळे पोदार स्कूल, नळवे फाटा येथे गतिरोधकांची गरज आहे.