रमजान पर्वचे तीस निर्जळी उपवास गुरुवारी पूर्ण झाले. संपूर्ण महिना धार्मिक कार्यासाठी समाजबांधवांनी वाहून दिलेला होता. दररोज पाचवेळेचे नमाजपठण, कुराणपठण घरच्याघरी समाजबांधवांकडून नियमितपणे केले जात होते. गुरुवारी चंद्रदर्शन घडले आणि चालू इस्लामी महिना रमजानची सांगता होऊन 'शव्वाल' महिन्याला प्रारंभ झाला. या इस्लामी महिन्याच्या १ तारखेला शुक्रवारी सकाळी ईद साजरी करण्यात आली.
कोरोनाच्या संसर्गामुळे यंदा ईदचे नमाजपठण मशिदींमधूनदेखील होऊ शकले नाही. यामुळे समाजबांधवांचा काहीसा हिरमोड झाला. अबालवृद्धांनी घरच्या घरीच फातिहापठण व नमाजपठण केले. बाजारपेठा बंद राहिल्याने बहुतांश नागरिकांनी यंदा ईदची खरेदीदेखील केली नसल्याने जुनेच कपडे स्वच्छ धुवून, इस्त्री करून परिधान केल्याचे दिसून आले. नागरिकांनी ईदची खरेदी कोरोनाच्या संसर्गामुळे याहीवर्षी पुढे ढकलली. संपूर्ण मुस्लिमबहुल भागात ईद उत्साहात आणि शांततेत पार पडली. ईदगाहवरदेखील कडक पोलीस बंदोबस्त तैनात करण्यात आला होता.
शिरखुर्म्याचा दरवळला खमंग सुगंध
रमजान ईदचे 'शिरखुर्मा' हे खाद्यपदार्थ विशेष आकर्षण असते. दूध आणि सुकामेवा एकत्र करून तयार केले जाणाऱ्या या खाद्यपदार्थाचा तसेच शेवयांचा सुगंध शुक्रवारी सकाळी मुस्लिमबहुल भागात दरवळलेला जाणवला. ईदच्या शुभेच्छा देण्यासाठी घरी येणाऱ्या नातेवाईक, मित्र परिवाराचे शिरखुर्मा देऊन तोंड गोड करण्यात येते.
उत्साह द्विगुणित
यावर्षी शुक्रवारी ईद आल्याने समाजबांधवांचा उत्साह द्विगुणीत झाला होता. जणू एकप्रकारे हा दुग्धशर्करा योग ठरला. कारण धर्माचे प्रेषित हजरत मुहम्मद पैगंबर यांनी शुक्रवारला साप्ताहिक ईदचा दिवस असे म्हटले आहे, असे धर्मगुरू सांगतात. दुपारी शुक्रवारचे नमाजपठणदेखील समाजबांधवांनी घरातच केले.