लॉकडाऊनच्या काळात प्रकल्प अधिकारी अविशांत पांडा यांच्या संकल्पनेतून व चतुर्थश्रेणी कर्मचाऱ्यांच्या परिश्रमातून साकारण्यात आलेल्या एकात्मिक आदिवासी विकास प्रकल्पात अद्ययावत अभिलेख कक्ष साकारण्यात आला आहे. या अभिलेख कक्षामुळे प्रकल्प कार्यालयातील ऐतिहासिक दस्तावेज, अभिलेखे जतन करून ठेवण्यास मदत होणार असून त्यांचे व्यवस्थापन ठेवणेही सोपे होणार आहे. यामुळे कार्यालयीन वेळ व श्रम वाचण्यास मदत होणार असून प्रशासन गतिमान होणार आहे. या अद्ययावत अभिलेख कक्षाचे उद्घाटन पांडा यांच्या हस्ते करण्यात आले. यासोबतच नूतनीकरण करण्यात आलेले प्रकल्प अधिकारी कक्ष व व्हीसीरूमचेही उद्घाटन प्रकल्प अधिकारी पांडा यांच्या हस्ते करण्यात आले.
कार्यक्रमास वैद्यकीय अधिकारी डॉ.महेंद्र चव्हाण, नायब तहसीलदार शैलेंद्र गवते, सहायक प्रकल्प अधिकारी एन.डी. जानगर, नियोजन अधिकारी तोरावणे, सहायक प्रकल्प अधिकारी (शिक्षण) संजय चौधरी, एस. आर. सोळंकी, कार्यालयीन अधीक्षक अमित वसावे, शिक्षण विस्तार अधिकारी एन. डी. ढोले, बी.आर. मुगळे, जी. डी. अखडमल, उपलेखापाल डी. डी. दावडे, लेखा अधिकारी हिरालाल जिपकाटे व प्रकल्प कार्यालयातील कर्मचारी उपस्थित होते.