शहादा तालुक्यात १३ शासकीय आणि तीन खासगी अशी एकूण १६ लसीकरण केंद्र आहेत. पैकी शहरात फक्त एकच शासकीय केंद्र आहे. या सर्व केंद्रावर अजूनही पाहिजे, तेवढे लसीकरण झालेले नाही. कोविड १९चा प्रादुर्भाव बघता, लसीकरणाचा वेग वाढविणे आवश्यक आहे. त्यासाठी लसीकरण केंद्रांची संख्या वाढविणे आवश्यक आहे. शहरात आठ प्रभागांत आठ लसीकरण केंद्र उभारून प्रभागातच लसीकरणाची सोय झाल्यास लसीकरणाचा वेग वाढू शकतो. प्रत्येक प्रभागात ३/४ नगरसेवक आहेत. प्रभागात १०० टक्के लसीकरण करण्याची जबाबदारी या नगरसेवकांवर टाकली पाहिजे. आपल्या प्रभागातील मतदारांचे आरोग्य सुरक्षित राखणे ही या नगरसेवकांचीही जबाबदारी असल्याने जिल्हाधिकाऱ्यांनी शहरातील नागरिकांचे १०० टक्के लसीकरण करण्याची जबाबदारी नगरपालिका प्रशासनावर टाकली पाहिजे, तरच लसीकरणाचा वेग वाढू शकेल. ग्रामीण भागातही ग्रामपंचायत सदस्य, पंचायत समिती सदस्य आणि जिल्हा परिषद सदस्यांवर त्या-त्या गावातील ग्रामस्थांच्या लसीकरणाची जबाबदारी सोपवली पाहिजे. लसीकरण झाल्याने सुरक्षिततेची भावना निर्माण होत असल्याने तालुक्यातील भीतीचे वातावरण कमी होऊन काही प्रमाणात का होईना, तालुक्यात कोविड १९ला आळा बसू शकेल.
--------------------------------------------------------------
नगरपालिका क्षेत्रात नगरसेवक, नगराध्यक्ष यांचा तर ग्रामीण क्षेत्रात ग्रामपंचायत सदस्य, पंचायत समिती सदस्य व जिल्हा परिषद सदस्यांचा प्रभाव असतो. कोविड १९ लसीकरण संदर्भात अजूनही काही गैरसमज असल्याने लोक लसीकरणासाठी पुढे येत नाहीत. अशा वेळी लोकप्रतिनिधी आपल्या प्रभागातील, वार्डातील मतदारांचे प्रबोधन करून त्यांचे लसीकरण करून घेऊ शकतात. लोकप्रतिनिधींनीही आपली जबाबदारी समजून आपल्या प्रभागात १०० टक्के लसीकरण करून प्रशासनास मदत केली पाहिजे, असेही बोलले जात आहे.