नंदुरबार : कोरोनाबाधितांसाठी काम करणारे आरोग्य कर्मचारी आणि विविध यंत्रणेतील कर्मचारी यांचे प्रथम लसीकरण करण्याचा निर्णय घेण्यात आला होता. यानुसार, जिल्ह्यात सध्या कामकाज सुरू आहे. यातून आजवर ३५ हजार हेल्थ केअर वर्कर्स आणि फ्रंटलाइन वर्कर्स यांना पहिला डोस दिला गेला असून, १६ हजार जणांनी दुसरा डोस घेतला आहे.
जिल्ह्यातील सर्व सहा तालुक्यांत या कर्मचाऱ्यांची नोंदणी करून त्यांना लसीकरणासाठी निरोप देत, लस घेण्यास पाचारण करण्यात आले होते. यातून लसीकरणाचा जिल्ह्याचा टक्का वाढला असून, बहुतांश कर्मचाऱ्यांचा दुसरा डोस शिल्लक असल्याचे सांगण्यात आले आहे. जिल्ह्यातील विविध भागांत काम करणारे हे कर्मचारी निरोगी राहून सक्रिय राहावेत, यासाठी त्यांच्या आरोग्याची माहिती घेत टप्प्याटप्प्याने लसीकरण पूर्ण करण्यात येत होते. आरोग्य, महसूल, पोलीस, नगरपालिका, शिक्षक, शिक्षकेतर कर्मचारी यासह विविध शाखांमध्ये काम करणाऱ्या सरकारी कर्मचारी व अधिकाऱ्यांनाही लस देण्यात आली आहे. जिल्ह्यात सर्वच कर्मचाऱ्यांच्या नोंदण्या करण्यात आल्यानंतर, त्यांना कोविशिल्डचे डोस देण्यात येत होते. यातून आजघडीस इतर जिल्ह्यांत लसीचा तुटवडा असल्याने जिल्ह्यात मात्र ५० हजार डोस उपलब्ध आहेत. यातून सर्व कर्मचाऱ्यांना दुसरा डोस सहज मिळणार असून, इतर वयोगटांनाही लसींचे डोस देण्यावर भर देण्यात येणार असल्याची माहिती देण्यात आली आहे. लसीकरणानंतर एकही कर्मचारी बाधित नसल्याचे सांगण्यात आले.
जिल्ह्यात आरोग्य कर्मचारींचे १११ तर फ्रंटलाइन वर्कर्सचे एकूण २०० टक्के लसीकरण झाल्याचे सांगण्यात आहे. प्रशासनाने या कर्मचाऱ्यांची ऑनलाइन नोंदणी पूर्ण केल्यानंतरही सातत्याने त्यांच्या नोंदण्या सुरू राहिल्या होत्या. यातून ३५ हजार ९४९ आरोग्य व फ्रंटलाइन कर्मचारी यांचे लसीकरण झाले आहे. सर्वच तालुक्यात काम करणारे कर्मचारी पुढे येत आहेत. या सर्वांचा पहिला डोस पूर्ण झाला असून, १६ हजार ६२७ जणांचा दुसरा डोस पूर्ण झाला असल्याचे सांगण्यात आले आहे.