नंदुरबार : जिल्ह्यात आधीचे ३० टक्के लसीकरण पूर्ण करण्यात आले असून आता १ मेपासून १८ वर्षे वयापुढील जवळपास १२ लाख जणांना लसीकरणास सुरुवात होणार आहे. त्यासाठीचे नियोजन करण्यात येत असून यासाठी एक लाख डोसची मागणी करण्यात आली आहे.
जिल्ह्यात १६ जानेवारीपासून लसीकरणास सुरुवात झाली. पहिल्या टप्प्यात फ्रंटलाइन वर्कर यांना लसीकरण करण्यात आले. त्यापैकी २० टक्के जणांनी लसीकरण केले नव्हते. ते आता पूर्ण करण्यात आले. त्यानंतर ज्येष्ठ नागरिकांनाही लसीकरण करण्यात आले. ४५ वर्षे वयापुढील नागरिकांना लसीकरणाचा निर्णय झाल्यानंतर वेग वाढला आहे. त्यामुळे जिल्ह्यात एक लाख लसीकरणाचा टप्पा ओलांडला आहे. नंदुरबार व शहादा तालुक्यातील गावांमध्ये लसीकरण मोहीम राबविण्यात येत असून आता १८ वर्षे वयापुढील १२ लाख जणांना जिल्ह्यात लसीकरण करण्यात येणार आहे.
मे महिन्यात वेग वाढणार...
एकूण ११ हजार ७३८ आरोग्य कर्मचाऱ्यांना पहिली मात्रा, तर सहा हजार ७०३ कर्मचाऱ्यांना दुसरी मात्रा देण्यात आली.
कोरोनायोद्धा यापैकी १४ हजार ३२७ व्यक्तींना पहिली, तर सहा हजार ३१६ व्यक्तींना दुसरी मात्रा देण्यात आली.
४५ ते ६० वयोगटांतील व्यक्तींपैकी २५ हजार ३७ व्यक्तींना पहिली तर तीन हजार ३५५ ना दुसरा डोस देण्यात आला.
६० वर्षांपेक्षा अधिक वयाच्या २८ हजार २८४ ज्येष्ठ नागरिकांना पहिली आणि पाच हजार २७२ ज्येष्ठ नागरिकांना लसीची दुसरी मात्रा देण्यात आली.
एकूण ७९ हजार ३८६ व्यक्तींना लसीची पहिली मात्रा, तर २१ हजार ६४६ व्यक्तींना दुसरी मात्रा अशा एकूण एक लाख एक हजार ३२ चा टप्पा पार झाला.
जिल्ह्यात १ मेपासून लसीकरणाचे केंद्र वाढविण्यात येणार आहे. त्यासाठी नियोजन करण्यात येत आहे.
जास्तीत जास्त जणांचे लसीकरण व्हावे यासाठी विविध माध्यमांतून जनजागृती केली जात आहे.
एक लाख डोसची मागणी नोंदविण्यात आली असून ते मिळाल्यावर लसीकरणाचा वेग वाढणार आहे.
ग्रामीण भाग उदासीन
लसीकरणासाठी ग्रामीण भाग उदासीन असल्याचे चित्र आहे. त्यामुळे शहरी भागातच लसीकरणाला वेग आलेला दिसत आहे. प्रशासनाने ग्रामीण भागात विशेष जनजागृती केली असून शिबिरेही घेतली जात आहेत. त्यामुळे वेग वाढत आहे.