दागिने विक्री व मोड करण्यासाठी सोनारांकडे गर्दी

कोठार : कोविड परिस्थितीमुळे हातावर पोट असणाऱ्यांना पोट भरणासाठी पैशांची चणचण भासत असल्याने सोने-चांदीचे दागिने मोड करण्यासाठी सराफा व्यवसायाकडे येतात. मात्र, दुकाने बंद असल्याने त्यांना अडचणीच्या सामना करावा लागत आहे. सराफ व्यावसायिकांना लाॅकडाऊनमधून काहीअंशी सूट मिळावी अशी मागणी सराफ व्यावसायिक संघटनेने केेली आहे. या मागणीचे निवेदन, तहसीलदार गिरीश वखारे यांना देण्यात आले. निवेदनात, नंदुरबार जिल्ह्यात कोरोनाचा प्रादुर्भाव दिवसेंदिवस वाढत आहे व आपल्या जिल्ह्यात रुग्णांची संख्या वाढत असल्याने लोकांना दवाखान्यात दाखल होण्यासाठी पैशांची नितांत आवश्यकता असते व आपला जिल्हा हा आदिवासी जिल्हा असल्याने बँकिंग व्यवहार करणे शक्य नाही. त्यामुळे सोने, चांदीचे दागिने गोरगरीब जनता मोड करण्यासाठी, विक्री करण्यासाठी येतात. मात्र, सोने-चांदीचे दुकाने बंद असल्याने त्यांना वणवण भटकावे लागते. कारण सद्य:परिस्थिती भयंकर खराब असल्याने ग्राहक अक्षरशः भांडणावर उतरतात. तरी आम्ही सराफ व्यावसायिक लाॅकडाऊनचे आदेशाच्या स्वागत करीत आहोत. कारण परिस्थिती ही सर्वांना माहीत आहे; परंतु अशा परिस्थितीत ग्राहक व दुकानदाराचे संबंध पिढ्यान्‌पिढ्याचे असल्या कारणाने त्यांच्या दुःखात त्याने दागिने मोडून पैसे देणे हे माणुसकीचे नाते सांभाळत अशा परिस्थितीत ही मानवीय सेवा आहे, हे नाकारू शकत नाही. तळोदा शहर १०० टक्के लाॅकडाऊन झाले पाहिजे. कारण गावात येणाऱ्या ग्राहकांना अर्धे गाव सुरू, अर्धे गाव बंद असल्याने संभ्रम निर्माण होतो. सर्व बाबींचा विचार करून योग्य ते सहकार्य व्हावे, अशी मागणी करण्यात आली आहे.