लोकमत न्यूज नेटवर्क
नंदुरबार : ‘माणुसकीच्या शत्रूसंगे युद्ध आमुचे सुरू, जिंकू किंवा मरू...’ प्रसिद्ध गीतकार आणि लेखक ग.दी. माडगूळकर यांच्या या गीताचे बोल येथील जिल्हा रुग्णालयात रुग्णांना सेवा देणाऱ्या गायत्री गावित या परिचारिकेच्या सेवेसाठी अगदी तंतोतंत खरे ठरतात. अंगात तापाचा कहर आणि हाताला सलाईन असताना व्हेंटिलेटरवरील रुग्णांना त्या सेवा देत आहेत.
राज्यात आणि नंदुरबार जिल्ह्यात कोरोनाचा कहर सुरू आहे. रुग्णांची संख्या प्रचंड वाढत असल्याने रुग्णांना दवाखान्यात बेड मिळत नाही. बेड मिळाले तर ऑक्सिजन नाही, ऑक्सिजन मिळाले तर इंजेक्शन नाही, अशा अनेक समस्या निर्माण झाल्या आहेत. त्यात रुग्णांच्या गरजा लक्षात घेता संधिसाधूंचीही कमी नाही. अनेक ठिकाणी रुग्णांना सेवा मिळत नसल्याची बोंब कायम आहे; पण अशाही स्थितीत रुग्ण सेवा हीच ईश्वर सेवा या भावनेने सेवा देणारे डॅाक्टर आणि परिचारिका खरोखरच रुग्णांसाठी देवदूत म्हणून काम करीत आहेत. बुधवारी असाच देवदूत येथील जिल्हा रुग्णालयात गायत्री अर्जुन गावित या परिचारिकेच्या रूपाने पाहायला मिळाला. गेल्या वर्षभरापासून ही परिचारिका येथील जिल्हा रुग्णालयात कोविड रुग्णांना सेवा देत आहे. या काळात स्वत:देखील अनेक वेळा आजारी असताना त्यांनी मात्र रुग्णसेवेत कुठलीही कुचराई केली नाही. गेल्या दोन दिवसांपासून त्या तापाने फणफणत असतानाही त्यांची ही सेवा सुरूच आहे. बुधवारी त्या स्वत: रुग्णालयात उपचार घेत आहेत आणि रुग्णांना सेवाही देत असल्याचे चित्र दिसून आले. त्यांनी हाताला सलाईन लावले होते; पण व्हेंटिलेटरवरील रुग्णासाठी अत्यावश्यक सेवेची गरज असल्याने सलाईन हातात घेऊन त्या या रुग्णांना सेवा देत होत्या, तसेच स्वत: अनुभवी असल्याने इतर परिचारिकांनाही त्याच स्थितीत त्या मार्गदर्शन करून कुठल्या रुग्णावर काय उपचार करावेत, याबाबत मार्गदर्शन करीत होत्या. त्यांची ही सेवा पाहून रुग्णालयात वेदनेने पिडा सोसणाऱ्या रुग्णांनादेखील गहिवरून आले होते.
दोन दिवसांपासून ताप असल्याने आपण येथे उपचार घेत आहोत; पण काही रुग्णांना अत्यावश्यक सेवा देणे गरजेचे असल्याने जेवढी सेवा देणे शक्य ते देण्याचा प्रयत्न करीत आहे. माझ्या सोबत असलेल्या परिचारिकादेखील तळमळीने काम करीत आहेत. गेल्या वर्षभरापासून येथे आपण रुग्णांची वेदना पाहत आहोत. या वेदना आपल्या हातून जेवढ्या कमी करता येतील त्यासाठी प्रयत्न राहील.
-गायत्री गावित,
परिचारिका, जिल्हा रुग्णालय.