शहादा : तालुक्यातील ग्रामीण भागातील शेतशिवारांमधील उन्हाळी हंगामातील बाजरीची कापणी अंतिम टप्प्यात आली आहे. बाजरीच्या कापणीला वेग आला असून, यामुळे शेतमजुरांना रोजगार उपलब्ध झाला आहे. बाजरी कापणीनंतर त्या शेतात खरीप हंगामातील पीक घेण्यासाठी शेतकऱ्यांकडून नियोजन सुरू आहे.
ग्रामीण भागात रब्बी हंगामातील बाजरीची कापणी सुरू आहे. तसेच शेतातील बाजरीची तुटलेली कणसे वेचून अनेकांना रोजगार व खाण्यासाठी बाजरी उपलब्ध होत आहे. शहादा तालुक्यातील वडगाव, शोभानगर, पाडळदे, अलखेड, आवगे, जुनवणे शेतशिवारात पाणी कमी होत असल्याने ऊस, केळी व पपई आदी बागायती पिकांच्या क्षेत्रात घट होणार असल्याचे चित्र आहे. त्यामुळे सिंचनाची थोडीफार सोय असणाऱ्या तसेच काही शेतकऱ्यांनी सुसरी धरणातून उपलब्ध होणाऱ्या पाण्यावर उन्हाळी हंगामातील बाजरीची पेरणी केली होती. बाजरीची कणसे भरत आल्याने शेतकऱ्यांनी बाजरी पिकाची कापणी करत थ्रेशरच्या सहाय्याने बाजरी काढण्यात येत आहे.
बाजरीची कापणी व मळणी शेवटच्या टप्प्यात आली असल्याने व सकाळी उन्हाची तीव्रता कमी राहात असल्याने बाजरी कापणीला वेग आला आहे. त्यामुळे लॉकडाऊनमध्ये आर्थिक संकटात सापडलेल्या मजुरांना काही दिवसांकरिता रोजगार उपलब्ध झाला आहे. बाजरीचे पीक काढल्यानंतर खरीप हंगामातील पिके घेण्यासाठी नांगरणीसह शेतीची इतर मशागत करून विविध पिकांची पेरणी करणार असल्याचे शेतकऱ्यांनी सांगितले.