नंदुरबार : बांधकाम व्यवसाय ४० टक्क्यांवर आला आहे. त्यामुळे बांधकाम मजुरांवर उपासमारीची वेळ आली आहे. दरम्यान, बांधकामाला परवानगी असली तरी बांधकाम साहित्य विक्रीची दुकाने बंद राहत असल्यामुळे मोठी समस्या निर्माण झाली आहे.
संचारबंदीच्या काळात बांधकाम सुरू ठेवण्यास परवानगी देण्यात आली आहे. परंतु, बांधकामासाठी लागणाऱ्या साहित्याच्या विक्रीची दुकाने बंद ठेवण्यात येत आहेत. त्यामुळे ६० टक्के बांधकाम बंद पडलेली आहेत. परिणामी बांधकाम व्यवसाय ठप्प झाला आहे. याशिवाय खडी, रेती, वीटभट्टी या ठिकाणी काम करण्यासाठी येणारे मजूरही वाहनाअभावी येत नसल्यामुळे त्या साहित्याचीही टंचाई निर्माण झाली आहे. बहुतेक मजूर हे आपल्या गावी निघून गेले आहेत. त्यामुळे बांधकाम ठेकेदारांना मजूर शोधण्याची कसरत करावी लागत आहे. खासगी बांधकामासह शासकीय बांधकामेही रखडली असल्याचे चित्र आहे. १ मे नंतर काय निर्णय होतो त्यावर बांधकाम क्षेत्रातील उलाढालीचे भवितव्य अवलंबून आहे.