लाेकमत न्यूज नेटवर्क
रामटेक : ट्रकला ओव्हरटेक करण्याच्या नादात माेटरसायकलवर मागे बसलेली मैत्रीण उसळल्याने खाली काेसळली व ट्रकच्या चाकाखाली आल्याने तिचा घटनास्थळीच मृत्यू झाला तर तिचा मित्र गंभीर जखमी झाला. ही घटना रामटेक पाेलीस ठाण्याच्या हद्दीतील रामटेक-मनसर मार्गावर रविवारी (दि. २५) दुपारी १ वाजताच्या सुमारास घडली.
स्नेहा अजय मेश्राम (१५, रा. गल्ली क्रमांक-९, इंदिरानगर, जरीपटका, नागपूर) असे मृत मुलीचे तर आकाश ईश्वर सहारे (१९, रा. गल्ली क्रमांक- ५, कस्तुरबा नगर, नागपूर) असे जखमीचे नाव आहे. दाेघांची मैत्री असल्याने ते रविवारी दुपारी एमएच-४९/डीजी-८५५५ क्रमांकाच्या माेटरसायकलने रामटेक परिसरात फिरायला आले हाेते. आकाश माेटरसायकल चालवित हाेता तर स्नेहा मागे बसली हाेती.
ते मनसरहून रामटेकच्या दिशेने येत असताना या मार्गावरील श्रीकृष्ण मंदिराजवळ येताच आकाशने समाेर असलेल्या एमएच-४०/बीजी-९६१५ क्रमांकाच्या ट्रकला ओव्हरटेक करण्याचा प्रयत्न केला. दाेन्ही वाहने समांतर येताच ताेल गेल्याने स्नेहा खाली काेसळली व वेगात असलेल्या ट्रकच्या चाकाखाली आली. त्यात तिचा घटनास्थळीच मृत्यू झाला. शिवाय, धक्क्याने आकाश बाजूला पडल्याने ताेही जखमी झाला. माहिती मिळताच पाेलिसांनी घटनास्थळ गाठून आकाशला उपचारासाठी तर स्नेहाचा मृतदेह उत्तरीय तपाणीसाठी रामटेक शहरातील उपजिल्हा रुग्णालयात आणला. आकाशवर रामटेक शहरात उपचार सुरू असल्याची माहिती पाेलिसांनी दिली. याप्रकरणी रामटेक पाेलिसांनी भादंवि २७९, ३०४ (अ) अन्वये गुन्हा दाखल केला असून, या घटनेचा तपास पाेलीस उपनिरीक्षक शिवाजी बाेरकर करीत आहेत.