Women's Day 2019; टीचर ते डीसीपी; श्वेता खेडकरांचा यशस्वी प्रवास

सरळ साधी शिक्षिका म्हणून विद्यार्थी- शिक्षकांमध्ये ओळखल्या जाणारी श्वेता खेडकर चक्क पोलीस उपअधीक्षक म्हणून पोलीस दलात रुजू होते.

ठळक मुद्देधाडसी अन् कर्तृत्ववान अधिकारी

नरेश डोंगरेलोकमत न्यूज नेटवर्कनागपूर: मार्च २०११ मध्ये नागपुरात मोनिका किरणापुरे हत्याकांडाने खळबळ उडवली होती. लाख प्रयत्न करूनही आरोपी हाती लागत नव्हते. या प्रकरणाचा तपास राज्य पोलीस दलाच्या प्रतिष्ठेचा विषय ठरला होता. त्यावेळी अमरावतीच्या एसीपी म्हणून कार्यरत असलेल्या श्वेता खेडकर नागपुरात आल्या. जेथे मोनिका राहत होती, त्या वसतिगृहात श्वेता विद्यार्थिनी म्हणून मुक्कामी थांबल्या अन् अवघ्या पाच दिवसात त्यांनी या तपासाचा धागा पकडला. या धाग्यामुळेच मारेकऱ्यांच्या हातात पोलिसांना बेड्या ठोकता आल्या.अमरावती जिल्ह्यातील खेड(ता. चांदूर बाजार)मधील श्वेता सदाशिव खेडकर ही युवती राज्यशास्त्र, समाजशास्त्रात एम.ए. करते. २० व्या वर्षीच (१९९८) शिक्षिका म्हणून चिखलदरा तालुक्यातील मोथा या खेडेगावात जिल्हा परिषदेच्या शाळेत शिक्षिका म्हणून रुजू होते.खोडकर विद्यार्थ्यांना वळणावर आणणे जास्त कठीण नाही. नियोजनपूर्वक प्रयत्न केले तर त्यांना लवकर वळणावर आणता येते. मात्र समाजाला अस्वस्थ करू पाहणाऱ्या समाजकंटकांना वळणावर नव्हे वठणीवर आणणे फार कठीण असते. कारण विद्यार्थी खोडकर असला तरी तो सामाजिक संस्कारात, कौटुंबिक धाकात असतो. गुन्हेगाराचे संस्काराशी देणे-घेणे नसते अन् त्याला कुणाचा धाकही वाटत नाही, म्हणून तो समाजाला आपल्या धाकात ठेवण्याचा प्रयत्न करतो. त्यामुळे त्यांच्या वाटेला कुणी जात नाही अन् त्यांना समजाविण्याचे आव्हान स्वीकारण्याच्याही कुणी भानगडीत पडत नाही. शाळेत शिकविताना ही बाब ध्यानात आल्यानंतर एक सरळ साधी शिक्षिका गुन्हेगारांना धडा शिकविण्याचा मनोमन विडा उचलते. कुणाच्या ते ध्यानीमनीही नसते. त्यानंतर कोणतीही अकादमी नव्हे अन् कुणाचेही मार्गदर्शन न घेता छोट्याशा खेड्यातून रोज शाळेत शिकवायला जाताना कधी काळी-पिवळीतून तर कधी एसटीतून अप-डाऊन करताना समाजकंटकांना धडा शिकविण्याचा अभ्यास सुरू राहतो. परिणामी, सरळ साधी शिक्षिका म्हणून विद्यार्थी- शिक्षकांमध्ये ओळखल्या जाणारी श्वेता खेडकर चक्क पोलीस उपअधीक्षक म्हणून पोलीस दलात रुजू होते.भंडारा जिल्ह्यातील तुमसरच्या पोलीस उपअधीक्षक म्हणून २००७ ला पहिली नियुक्ती मिळाली असताना, देश-विदेशात खळबळ उडवून देणारे खैरलांजी प्रकरण घडते. या प्रकरणाची हाताळणी अन् प्राथमिक तपास अग्निपरीक्षेपेक्षा कमी नसतो. चोहोबाजूने प्रचंड दडपण मात्र या तपासात महत्त्वाची भूमिका वठवून श्वेता खेडकर यांनी स्वत:ला अभ्यासू पोलीस अधिकारी म्हणून प्रूव्ह केलेले असते.शिक्षक-शिक्षिका बोलघेवड्या असतात, असे म्हणतात. क्लास घेताना अंगवळणी पडल्याप्रमाणे ही मंडळी कुठेही अघळपघळ बोलताना दिसतात. मात्र, श्वेता खेडकर अत्यंत शांत, संयमी आणि कमीतकमी बोलणाऱ्या आहेत.शहर पोलीस दलात कार्यरत डीसीपी श्वेता खेडकर म्हणजे एक हसतमुख, शांत अन् सुस्वभावी व्यक्तिमत्त्व. लॉटरी लागली, एटीएम कार्ड ब्लॉक झाले, असे सांगून देशभरातील लाखो लोकांना फसविणारी सायबर टोळी त्यांनी थेट झारखंडमध्ये जाऊन पकडली. कोट्यवधींचे आर्थिक घोटाळे करणारे नागपुरातील ठगबाज, नोकरीच्या नावाने फसवणूक करणाऱ्यांच्या नागपूर, चंद्रपूर, दिल्लीतील बोगस कॉल सेंटरवर त्यांनी छापे मारले. भंडाऱ्यातील खैरलांजी प्रकरणाचा तपास, बहुचर्चित मोनिका किरणापुरे हत्याकांड, अमरावतीतील टोळीयुद्ध, जातीय दंगल अशी पोलीस दलास जेरीस आणणाऱ्या अनेक प्रकरणात त्यांनी मोलाची कामगिरी बजावलेली आहे. त्यांच्याकडे बघितल्यास, त्यांना पहिल्यांदा भेटल्यास ही महिला अधिकारी एवढी धाडसी आणि कर्तृत्ववान आहे, हे लक्षातच येत नाही. पोलीस सेवेत त्यांना मिळालेली पदके आणि सन्मान त्यांच्या कर्तृत्वाची साक्ष देऊन जाते.