नागपूर : जुन्या वैमनस्यातून दोन तरुणांचा खून करण्यात आल्याच्या घटना पाचपावली आणि यशोधरानगर पोलिस ठाण्यांच्या हद्दीत मंगळवारी रात्रीच्या सुमारास घडल्यामुळे खळबळ उडाली आहे. तर सीताबर्डीत २६ मार्चला झालेल्या हाफ मर्डरमधील जखमी तरुणाचा उपचारादरम्यान मृत्यू झाल्यामुळे सीताबर्डी पोलिसांनी खुनाचा गुन्हा दाखल केला आहे.
पहिल्या घटनेत पाचपावली पोलिस ठाण्याच्या हद्दीत १५ दिवसांपूर्वी चापट मारल्यामुळे संतप्त आरोपींनी आपल्या साथीदारांच्या मदतीने तरुणाचा खून केला. उमेश नरेंद्र नंदेश्वर (२४, रा. कांजी हाऊस चौक) असे खून करण्यात आलेल्या तरुणाचे नाव आहे. तर आरोपींमध्ये अंशुल विष्णू पांडे (२२), शुभम नत्थुजी गजभिये (२६), अक्षय भीमराव वासनिक (२२), सम्यक संजय वासनिक (२५) आणि क्षितिज रत्नदीप लोखंडे (२२) (रा. आदर्शनगर) यांचा समावेश आहे. या खुनाचा सूत्रधार अंशुल पांडे आहे. तो चहा टपरी चालवतो. मृत उमेश नंदेश्वर हा वाहनचालक होता. उमेश, अंशुल आणि इतर आरोपी एकमेकांच्या ओळखीचे आहेत. १५ दिवसांपूर्वी उमेश आणि अंशुल एका हळदीच्या कार्यक्रमात गेले होते. तेथे कोणत्या तरी कारणावरून त्या दोघांमध्ये वाद झाला. यावेळी उमेशने अंशुलला चापट मारली. त्यामुळे अंशुल संतप्त झाला होता. तीन दिवसांपूर्वी पुन्हा दोघांमध्ये हाणामारी झाली. परंतु, तेथे उपस्थित असलेल्या त्यांच्या मित्रांनी मध्यस्थी केल्यामुळे प्रकरण शांत झाले. त्यानंतर अंशुल उमेशला धडा शिकविण्यासाठी संधी शोधू लागला. मंगळवारी रात्री ११ वाजता पाचपावलीच्या पंचशील चौकातील तक्षशिला बिल्डींगसमोर अंशुल आणि त्याच्या चार साथीदारांना उमेश दिसला. त्यांनी पुन्हा उमेशसोबत वाद घातला आणि धारदार शस्त्राने वार करून त्याला गंभीर जखमी केले.
परिसरातील नागरिकांनी याबाबत पोलिसांना सूचना दिली. पोलिसांनी जखमी उमेशला मेयो रुग्णालयात दाखल केले. परंतु, डॉक्टरांनी तपासून त्याला मृत घोषित केले. नागरिकांनी उमेशची बहीण वैशाली हिला घटनेची माहिती दिली. रुग्णालयात पोहोचल्यानंतर तिला सर्व घटनाक्रम समजला. पाचपावली पोलिसांनी खून आणि ॲट्रॉसिटी ॲक्टनुसार गुन्हा दाखल करून आरोपींना अटक केली आहे. यातील अक्षय वासनिक बीएला शिकतो तर क्षितिज लोखंडे मार्केटिंगचे काम करतो. शुभम आणि संजय हे लहान-मोठे काम करतात. उमेशच्या कुटुंबात आई-वडील, दोन बहिणी आहेत. उमेशच्या कमाईवरच कुटुंबियांची उपजीविका भागत होती. त्याच्या खुनामुळे उमेशच्या कुटुंबावर दुखाचा डोंगर कोसळला आहे.
यशोधरानगरात डुकरांच्या त्रासामुळे खून
यशोधरानगरात डुकरांच्या त्रासामुळे एकाचा खून केल्याची घटना घडली असून, दुसरा गंभीर जखमी आहे. धीरज चुटेलकर (वय ३५, रा. संतोषनगर) असे खून झालेल्याचे नाव आहे तर जखमी आरोपी राजेश माणिकराव मन्ने (वय ४२, रा. गुलशननगर, कळमना) यांच्यावर उपचार सुरू आहेत. राजेश स्टार बसचालक आहे. धीरज चुटेलकर आणि त्याचा भाऊ राहुल (२८) आणि शुभम (२५) हे डुक्कर पालन करतात. आरोपी राजेश पूर्वी संतोषनगरात चुटेलकर बंधूंच्या शेजारी राहत होता. त्यावेळी पाळलेले डुक्कर घाण पसरवत असल्यामुळे राजेशचा चुटेलकर बंधूंशी नेहमीच वाद होत होता. त्यामुळे राजेश दीड वर्षांपूर्वी संतोषनगरातील घर विकून गुलशननगरात राहण्यासाठी गेला. मंगळवारी सायंकाळी राजेश किराणा घेण्यासाठी संतोषनगरात आला. यावेळी त्याचा जुन्या गोष्टींवरून धीरजसोबत वाद झाला. राजेश तेथून परतला. रात्री ११ वाजता तो चाकू घेऊन संतोषनगरला गेला व त्याने धीरजवर हल्ला केला. चाकूने वार करून त्याने धीरजला जखमी केले. धीरजचा आरडाओरडा ऐकून त्याचा भाऊ राहुल आणि शुभम घराबाहेर आले. राजेशने त्यांच्यावरही हल्ला केला. धीरजच्या भावांनी राजेशकडून चाकू हिसकावून घेत त्याच्यावर चाकूने वार केले. मात्र, जखमी झाल्यानंतरही राजेशने दगडाने मारून राहुल आणि शुभमला जखमी केले. दरम्यान, गंभीर जखमी झालेल्या धीरज आणि राहुल यांना मेयो रुग्णालयात दाखल करण्यात आले. तेथे धीरजचा मृत्यू झाला. यशोधरानगर पोलिसांनी राजेश मन्ने याच्याविरुद्ध खुनाचा आणि चुटेलकर बंधूंविरुद्ध खुनाच्या प्रयत्नाचा गुन्हा दाखल करून धीरजचा भाऊ शुभमला अटक केली आहे.
मेयो रुग्णालयात तणाव
उमेश आणि धीरजला उपचारासाठी मेयो रुग्णालयात पोहोचविण्यात आले होते. तेथे त्यांचे कुटुंबीय, मित्र आणि परिसरातील नागरिक मोठ्या संख्येने गोळा झाले. दोघांचाही मृत्यू झाल्याचे कळताच नागरिक संतप्त झाले. त्यामुळे मेयो रुग्णालय परिसरात तणावाचे वातावरण निर्माण झाले होते. पोलिसांना तारेवरची कसरत करून नागरिकांना शांत करावे लागले.
हाफ मर्डरमधील जखमी तरुणाचा मृत्यू
‘हमारे एरिया मे क्यू रुके हो और यहा पर सिगरेट क्यू पी रहे हो’ असे म्हणून स्कुटीवर आलेल्या आरोपींनी मित्रांसोबत गप्पा मारत असलेल्या ईश्वर रामचंद्र बोरकर (वय २३, रा. राजुरा, जि. चंद्रपूर) याच्या छातीवर, पोटावर व हनुवटीवर चाकूने वार करून गंभीर जखमी केले होते. बुधवारी उपचारादरम्यान ईश्वरचा मृत्यू झाला असून, सीताबर्डी पोलिसांनी आरोपींविरुद्ध खुनाचा गुन्हा दाखल केला आहे. ही घटना २६ मार्च रोजी पहाटे ३ वाजण्याच्या सुमारास भोले पेट्रोल पंपाजवळ घडली होती. रोशन विलास साकीनाला (२४, रा. डब्ल्यूसीएल कॉलनी, राजुरा, जि. चंद्रपूर) हे आपला मित्र ईश्वर रामचंद्र बोरकर, आकाश वाघमारे (२१), भोला परचाके आणि राहिल शेख यांच्यासोबत भोले पेट्रोल पंपाजवळ व्हीआयपी रोडवरील जलप्रदाय कार्यालयासमोर बोलत उभे होते. तेवढ्यात २० ते २५ वयोगटातील तीन आरोपी तेथे आले. त्यांनी ‘हमारे एरिया मे क्यू रुके हो’ म्हणून मारहाण सुरू केली. ईश्वर भांडण सोडविण्यासाठी गेला असता, आरोपींनी त्याला खाली पाडून चाकूने त्याच्यावर वार करून त्याला गंभीर जखमी केले होते. सीताबर्डी पोलिसांनी ईश्वरला उपचारासाठी मेयो रुग्णालयात दाखल केले होते. बुधवार, ५ एप्रिलला ईश्वरचा उपचारादरम्यान मृत्यू झाल्यामुळे सीताबर्डी पोलिसांनी आरोपींविरुद्ध खुनाचा गुन्हा दाखल केला आहे. या घटनेतील आरोपींची नावे कळली असून, अद्याप आरोपी हाती लागले नसल्याची माहिती सीताबर्डीचे वरिष्ठ पोलिस निरीक्षक अतुल सबनीस यांनी दिली.
................