नागपूरच्या हुडकेश्वरमधील शाळकरी मुलीवर बलात्कार

शाळकरी मुलीला (वय १५) नातेवाईकांच्या भेटीला नेतो, असे सांगून कारंजा लाडमध्ये राहणाऱ्या आरोपीने तिच्यावर बलात्कार केला. १७ ते २१ मे दरम्यान हा गुन्हा घडला. ईश्वर विजय दोडके (वय २०) असे आरोपीचे नाव असून तो वाशिम जिल्ह्यातील कारंजा लाड येथील रहिवासी आहे.

ठळक मुद्देआरोपी कॅटर्सचे काम करणारा

लोकमत न्यूज नेटवर्क 
नागपूर - शाळकरी मुलीला (वय १५) नातेवाईकांच्या भेटीला नेतो, असे सांगून कारंजा लाडमध्ये राहणाऱ्या आरोपीने तिच्यावर बलात्कार केला. १७ ते २१ मे दरम्यान हा गुन्हा घडला. ईश्वर विजय दोडके (वय २०) असे आरोपीचे नाव असून तो वाशिम जिल्ह्यातील कारंजा लाड येथील रहिवासी आहे. नागपुरात तो कॅटरर्सचे काम करतो. तो हुडकेश्वरमध्ये भाड्याने राहत होता. पीडित मुलीचे नातेवाईक त्याच्या कारंजा येथील घराजवळ राहतात. त्यामुळे त्याची पीडित मुलगी आणि तिच्या आईवडिलांसोबत ओळख आहे. यातून त्याचे पीडित मुलीच्या घरी जाणे-येणे होते. त्याने मुलीच्या कुटुंबीयांचा विश्वास संपादन केल्यानंतर मुलीला नातेवाईकांच्या घरी भेटीसाठी नेतो म्हणून १७ मे रोजी सकाळी ७ वाजता आपल्या सोबत नागपूरहून कारंजाला नेले. तेथे त्याने मुलीला धाक दाखवून तिच्यावर २१ मेपर्यंत वारंवार बलात्कार केला. त्यानंतर त्याने मुलीच्या नातेवाईकांची भेट न घालवून देताच तिला यवतमाळ येथे नेऊन सोडले. पीडित मुलगी तेथून आपल्या घरी कशीबशी नागपुरात पोहचली. येथे आल्यानंतर मुलीने आरोपीकडून झालेल्या अत्याचाराची माहिती आईवडिलांना दिली. त्यामुळे मुलीच्या आईवडिलांनी आरोपी दोडकेला विचारणा केली. दोडकेने त्यांच्याशी वाद घालून त्यांना अश्लील शिवीगाळ करीत लाथाबुक्क्यांनी मारहाण केली. पीडित मुलीने या प्रकरणाची तक्रार हुडकेश्वर ठाण्यात नोंदवली. पोलिसांनी बलात्कार, तसेच पोक्सो कायद्याच्या कलमान्वये आरोपी दोडकेविरुद्ध गुन्हा दाखल केला.