कुख्यात सफेलकरची पोलिसांनी काढली वरात

Notorious Safelkar arrested, Crime news नागपुरातील बहुचर्चित आर्किटेक्ट एकनाथ निमगडे आणि मनीष श्रीवास हत्या प्रकरणातील मुख्य आरोपी आणि कुख्यात गँगस्टर रणजित सफेलकरला मंगळवारी रात्री पोलिसांनी ताब्यात घेतले. बुधवारी सकाळी त्याला जिल्हा न्यायालयासमोर सादर करण्यात आले. यावेळी आकाशवाणी चौकातून न्यायालयापर्यंत पायी नेत पोलिसांनी त्याची वरात काढली.

ठळक मुद्दे७ एप्रिलपर्यंत पोलीस कोठडी : आर्किटेक्ट एकनाथ निमगडे हत्याकांड

लोकमत न्यूज नेटवर्क

नागपूर : नागपुरातील बहुचर्चित आर्किटेक्ट एकनाथ निमगडे आणि मनीष श्रीवास हत्या प्रकरणातील मुख्य आरोपी आणि कुख्यात गँगस्टर रणजित सफेलकरला मंगळवारी रात्री पोलिसांनी ताब्यात घेतले. बुधवारी सकाळी त्याला जिल्हा न्यायालयासमोर सादर करण्यात आले. यावेळी आकाशवाणी चौकातून न्यायालयापर्यंत पायी नेत पोलिसांनी त्याची वरात काढली. दरम्यान, न्यायालयाने त्याला ७ एप्रिलपर्यंत पोलीस कोठडीत ठेवण्याचे आदेश दिले.

काही दिवसांपूर्वीच नागपूर पोलिसांनी २०१६ मध्ये झालेल्या एकनाथ निमगडे हत्या प्रकरणाचा उलगडा करत एका अज्ञात व्यक्तीने कुख्यात गँगस्टर रणजित सफेलकरला तब्बल पाच कोटी रुपयांची सुपारी देऊन एकनाथ निमगडे यांची हत्या घडविली होती, असे समोर आणले होते. त्यानंतर पोलिसांनी फरार असलेल्या सफेलकर टोळीतील शरद ऊर्फ कालू हाटे आणि इतर काही गुंडांना अटक केली होती. मात्र टोळीचा म्होरक्या रणजित सफेलकर फरार होता. त्याला काल रात्री पोलिसांनी अज्ञात ठिकाणावरून ताब्यात घेतल्याची माहिती आहे. कुख्यात गँगस्टर रणजित सफेलकर पोलिसांच्या हाती लागल्यानंतर नागपुरातील इतर अनेक मोठ्या गुन्ह्यांचा खुलासा होण्याची शक्यता आहे.

गुन्हे शाखा पोलिसांनी बुधवारी संतोष आंबेकर प्रमाणे सफेलकरला हाफ पँटमध्ये पायी फिरवले. दुपारी ४ वाजेच्या सुमारास गुन्हे शाखेचे पथक सफेलकरला घेऊन आकाशवाणी चौकात पोहोचले. तेथून त्याला सत्र न्यायालय परिसरात पायी आणण्यात आले. सफेलकरला विना चपलेने पाहून लोकांना संतोष आंबेकरची आठवण झाली. असे करण्याचा एकमेव उद्देश म्हणजे त्याच्याबद्दलची लोकांमध्ये असलेली दहशत दूर करणे होते.

एन्काउण्टरच्या भीतीने सरेंडर केल्याची चर्चा

सफेलकरला पोलिसांनी अटक केल्याचे सांगितले जात असले तरी एन्काउण्टरच्या भीतीने सफेलकर हा स्वत:च सरेंडर झाल्याची गुन्हेगारी जगतात चर्चा आहे. आठवडाभरापूर्वी भंडारा येथे सफेलकर व पोलिसांचा सामना झाला होता. पोलीस त्याला पकडतील त्यापूर्वीच तो जंगलात पळून गेला. पुढे ट्रकने तो शेजारी राज्य मध्य प्रदेशात निघून गेला. भंडाऱ्यातील प्रकरणामुळे पोलीस त्याचा एन्काउण्टर करण्याच्या तयारीत असल्याची सफेलकरला भीती वाटत होती. त्यामुळे त्याने यासंदर्भात न्यायालयात याचिकासुद्धा दाखल केली होती. बुधवारी ही याचिका मागेसुद्धा घेतली. सूत्रानुसार आतापर्यंत मिळालेल्या माहितीनुसार सफेलकर निमगडे हत्याकाडांबाबत माहीत नसल्याचे सांगत आहे. मनीष श्रीवाससंदर्भात मात्र तो काही बोलत असल्याचे सांगितले जाते.

हाटे बंधूंची पोलीस कोठडी ६ पर्यंत वाढविली

गुन्हे शाखेने बुधवारी सफेलकर, काललू हाटे व त्याचा भाऊ भरत याला न्यायालयासमोर सादर केले. पोलिसांनी मनीष श्रीवासच्या मृतदेहाचे अवशेष गोळा करणे, योजनेत सामील इतर आरोपींचा शोध लावण्यासाठी पोलीस कोठडी देण्याची विनंती केली. न्यायालयाने ही विनंती मान्य करीत सफेलकरला ७ एप्रिलपर्यंत पोलीस कोठडीत पाठवले, तर हाटे बंधूंची पोलीस कोठडीसुद्धा ६ एप्रिलपर्यंत वाढविली.