नागपूर : एनआयएच्या (नॅशनल इन्व्हेस्टिगेटिव्ह एजन्सी) पथकाने गुरुवारी नागपूर जिल्ह्यात चार ठिकाणी ‘सर्च ऑपरेशन’ राबविल्याने खळबळ उडाली. शहरात तीन ठिकाणी तीन जणांची चौकशी करण्यात आली. तर कुही-मांढळमधील एका मोबाइल विक्रेत्याचीदेखील झाडाझडती घेण्यात आली. देशविरोधी कृत्य आणि धार्मिक कट्टरता पसरवणारे दहशतवादी मॉड्यूल गझवा-ए-हिंद प्रकरणात ही कारवाई करण्यात आली असल्याची माहिती सूत्रांनी दिली आहे. सतरंजीपुरा तसेच कोतवाली पोलिस ठाण्याच्या हद्दीत ही कारवाई झाली.
गुरुवारी पहाटे एनआयएच्या पथकाने कोतवाली पोलिस ठाण्यांतर्गत गवळीपुरा येथील रहिवासी फरहान अली लियाकत अली, लकडगंज पोलिस ठाण्यांतर्गत सतरंजीपुरा येथील मोठ्या मशिदीजवळ राहणारा मो. अख्तर रजा, मुख्तार रैन व अब्दुल मुख्तादीर, अब्दुल गुलाम मुस्तफा व कुही येथील जमील कुरेशी यांच्या घरावर छापा टाकला. छापा टाकला त्यावेळी चारही जण झोपले होते. एनआयए टीम आणि पोलिसांना पाहून त्यांना धक्काच बसला. एनआयएच्या पथकाने घरांना घेराव घालून झडती घेतली. त्यात मोबाइल, लॅपटॉप, पेन ड्राईव्ह आणि कागदपत्रे सापडली आहेत. यावेळी त्यांचे मोबाइल जप्त करण्यात आले. पाकिस्तानमधील काही संघटनांशी या दोघांचे बोलणे झाले होते का, याचीदेखील चाचपणी करण्यात येत आहे.
भाड्याने राहत होता गुलाम मुस्तफा
सूत्रांनी दिलेल्या माहितीनुसार, चारही संशयित ‘गझवा-ए-हिंद’शी संबंधित आहेत. संघटनेच्या म्होरक्यांशी त्यांनी अनेकदा संपर्क केला होता.अब्दुल मुस्तफा हा संबंधित परिसरात भाड्याने राहत होता, अशी माहिती एनआयएच्या नेटवर्कला मिळाली होती. त्यानंतर तातडीने ही कारवाई करण्यात आली. एनआयएच्या पथकाने संशयितांच्या नातेवाइकांचीही चौकशी केली आहे. फरहान अलीचा जुना गुन्हेगारी रेकॉर्ड आहे. अख्तर फळविक्रेता तर मुख्तदीर ऑटोचालक आहे.
कारवाईदरम्यान काही वेळ तणाव
एनआयएच्या पथकाने पहाटे चार वाजता चार संशयितांच्या घराला घेराव घातला. सुरक्षेच्या दृष्टीने सर्वांना ‘अलर्ट’ मोडमध्ये ठेवण्यात आले होते. एनआयए अधिकारी व पोलिस पाहून दोन संशयितांचे नातेवाईक संतप्त झाले. विनाकारण गोवण्यात आल्याचा आरोप करत त्यांनी आरडाओरडा सुरू केला. त्यामुळे काही काळ तणावाचे वातावरण निर्माण झाले होते.
कुहीत मोबाइल विक्रेत्याची तपासणी, सहा तास चौकशी
दरम्यान, मांडळ येथील एका मोबाइल दुकानदाराची एनआयएच्या पथकाने चौकशी केली. सकाळच्या सुमारास पथक तेथे पोहोचले व जमील कुरेशीची सहा तास चौकशी करण्यात आली. कुरेशीने २००९ ला मोबाइलचे दुकान सुरू केले होते व विविध कंपन्यांच्या सीमकार्डचीदेखील ते विक्री करत होते. २०१९ला कुरेशीने विकलेल्या काही सीमकार्डचा दुरुपयोग झाल्याची माहिती एनआयएच्या पथकाला मिळाली होती. याबाबत पथकाकडून कुरेशीची चौकशी करण्यात आली. यावेळी कुरेशीचा मोबाइल व २०१९ मध्ये विकलेल्या सीमकार्डसच्या कागदपत्रांची तपासणी केली.
काय आहे ‘गझवा-ए-हिंद’?
‘गझवा-ए-हिंद’चे प्रकरण जुलै २०२२ मध्ये समोर आले होते. बिहारमधील पटना जिल्ह्यातील फुलवारीशरीफ येथे या मॉड्युलमधील सदस्यांविरोधात गुन्हा दाखल करण्यात आला होता. हे मॉड्युल पाकिस्तानमधून नियंत्रित होत होते. संबंधित व्हॉट्सअॅप ग्रुपचा ॲडमिन मरघुब अहमद दानिश याला अटक करण्यात आली होती. त्याने सोशल माध्यमांच्या विविध प्लॅटफॉर्म्सवर ‘गझवा-ए-हिंद’ नावाने ग्रुप्स तयार केले होते. मरघुबने त्यात पाकिस्तानसह येमेन, बांगलादेश व भारतातील तरुणांना सदस्य बनविले होते. देशविरोधी कृत्य आणि धार्मिक कट्टरता पसरवण्यासाठी यात तरुणांचे ब्रेनवॉशिंग करण्यात येत होते. याच प्रकरणाची ‘लिंक’ नागपुरातदेखील आढळून आली.