नागपूर : डॉ. बाबासाहेब आंबेडकर आंतरराष्ट्रीय विमानतळाच्या खासगीकरणाची प्रक्रिया दुसऱ्यांदा नव्याने लवकरच काढण्यात येणार असल्याची महाराष्ट्र विमानतळ विकास कंपनीचे (एमएडीसी) उपाध्यक्ष आणि व्यवस्थापकीय संचालक दीपक कपूर यांनी मिहान प्रकल्पाच्या आढावा बैठकीत दिली. सहा महिन्यापूर्वी पदभार स्वीकारलेल्या कपूर यांनी मिहान प्रकल्पाची गुरुवारी पहिल्यांदा पाहणी केली, हे विशेष. मुख्यमंत्री उद्धव ठाकरे एमएडीसीचे अध्यक्ष आहेत.
यापूर्वी विमानतळाच्या खासगीकरणासाठी जीएमआर कंपनीने लावलेली अंतिम आर्थिक बोली महाविकास आघाडी सरकारने रद्द केली आहे. त्यामुळे विमानतळाच्या खासगीकरणाची संपूर्ण प्रक्रिया नव्याने सुरू करण्यात येणार आहे. सरकारच्या निर्देशानुसार विमानतळाच्या खासगीकरणाची प्रक्रिया पूर्ण करण्यात येणार आहे. बैठकीत मिहान इंडिया लिमिटेडतर्फे (एमआयएल) संचालित विमानतळाचे वरिष्ठ संचालक आबिद रुही यांनी विमानतळाच्या विकास कार्याची माहिती दिली. प्रवाशांच्या गरजेनुसार विकास कामे करण्यात येत आहेत. खासगीकरणाचा प्रस्ताव आल्याने नवीन काम करण्यात येत नसल्याचे त्यांनी स्पष्ट केले.
तत्कालीन मुख्यमंत्री देवेंद्र फडणवीस यांनी महाराष्ट्र विमानतळ विकास कंपनी व मिहान इंडिया लिमिटेडच्या बैठकीत जीएमआरच्या आर्थिक बोलीला एकूण उत्पन्नातील वाट्याच्या प्रमाणावर मार्च २०१९ मध्ये अंतिम मंजुरी दिली होती. त्यानुसार कंपनीने एपीव्हीकरिता भागीदार कंपनीही निवडली होती. पण सरकारने संपूर्ण कंत्राट देण्याची प्रक्रियाच रद्द केली. खासगीकरणासाठी जीएमआर कंपनीसह टाटा रिअॅलिटी, जीव्हीके, पीएनबी इन्फ्रोटेक व एस्सेल इन्फ्रा या पाच कंपन्यांनी निविदा सादर केली होती. खासगीकरणात पहिल्या टप्प्यात जवळपास ७०० कोटींचा विकास आराखडा तयार केला आहे. त्यात ७५ हजार चौरस मीटर जागेवर टर्मिनल इमारतीचे बांधकाम आणि चार हजार मीटर लांब व ६० मीटर रुंद दुसरी धावपट्टी तयार करण्यात येणार आहे.
मिहानमध्ये परिवहन सेवा सुरू करण्यासाठी मार्च महिन्यात मनपा, नासुप्र, परिवहन विभाग, मेट्रोसोबत मार्च महिन्यात चर्चा करण्यात येणार असल्याचे बैठकीत सांगण्यात आले. अमरावती विमानतळासाठी निविदा लवकरच काढण्यात येणार असल्याचे कपूर यांनी बैठकीत स्पष्ट केले.
बैठकीत एमएडीसी व एमआयएलचे अधिकारी, बुटीबोरी मॅन्युफॅक्चरिंग असोसिएशनचे अध्यक्ष प्रदीप खंडेलवाल, माजी अध्यक्ष नितीन लोणकर, सचिव श्रीकांत कोठारकर, वेदचे अध्यक्ष शिवकुमार राव आणि अनेक मान्यवर उपस्थित होते.
मिहानमध्ये नवीन उद्योगासाठी
जागेचे दर कमी करावेत
मिहानमध्ये अनेक लहान-मोठे उद्योग येण्यास उत्सुक आहे. पण जागेचे दर पाहता नवे उद्योग येत नाही. त्यामुळे लहान उद्योगांसाठी जागेचे दर कमी करावेत, अशी मागणी बुटीबोरी मॅन्युफॅक्चरिंग असोसिएशनचे सचिव श्रीकांत कोठारकर यांनी बैठकीत केली. मिहानमध्ये ज्या कंपन्यांनी जागा घेतल्या आहेत, पण अजूनही उद्योग सुरू केले नाहीत, अशा उद्योजकांकडून जागा परत घेण्यात येणार असून त्यांना नोटिसा बजावण्यात आल्या आहेत.