लोकमत न्यूज नेटवर्कनागपूर (कन्हान) : नागपूरहून मनसर येथील शिवगौरी देवीच्या दर्शनासाठी जाणाऱ्या युवकाचा अपघातीमृत्यू झाला. आशिष अरुण जोगे (२५) रा.स्नेहनगर, नागपूर असे मृत युवकाचे नाव आहे. ओव्हरटेक करण्याच्या प्रयत्नात ट्रकने त्याला चिरडले. त्याचा सार्थक नामक मित्र थोडक्यात बचावला. नागपूर-जबलपूर राष्ट्रीय महामार्ग क्रमांक ७ वर डुमरी परिसरातील चंपाश्रमाजवळ दुपारी ११.४५ च्या सुमारास हा भीषण अपघात घडला.मूळचा अमरावती जिल्ह्यातील टवलार (परतवाडा)चा रहिवासी असलेला आशिष मागील ६ वर्षांपासून नागपूर येथील नातेवाईक मिलिंद भांडे यांच्या घरी राहत होता. तो नागपुरातील एका न्यूज पोर्टलमध्ये काम करीत होता.शनिवारी सकाळी आशिष आणि त्याचा मित्र सार्थक कलोडे (२४) टीव्हीएस व्हिक्टर बाईक क्रमांक एम.एच. ३१- बी.के.४३०१ वरुन डबलसीट आणि आशिषचे काका शैलेश जोगे दुसऱ्या बाईकवर घरून शिवगौरी येथे जाण्यासाठी निघाले. डुमरी परिसर येथे चंपा आश्रमाजवळ आशिष एका बाईकला ओव्हरटेक करीत असताना बाईकचा मागचा भाग दुसºया बाईकला लागला. त्यामुळे वेगात असलेली आशिषची बाईक खाली वाकली. बाईक खाली वाकल्याने सार्थक गाडीवरून उतरला तर आशिष बाईकसह रस्त्यावर पडला. त्याचवेळी मागून भरधाव वेगात येणाऱ्या १० चाकी ट्रक क्रमांक आर.जे. ११- जी.ए.४७०७ चे चाक आशिषच्या अंगावरून गेले. दरम्यान, ट्रक चालकाने घाबरुन आशिष ट्रकखाली असल्याचा अंदाज बांधत ट्रक मागे घेतला त्यामुळे ट्रकची चाके पुन्हा आशिषच्या अंगावरून गेल्याने त्याचा घटनास्थळीच मृत्यू झाला. घटनेनंतर संतप्त जमावाने ट्रक चालक रोहतास कुमार सिंह (२६) रा.कछला, उत्तर प्रदेश याला पकडून बेदम चोप दिला. ट्रकचा क्लीनर घटनास्थळावरून पसार झाला. कन्हान पोलिसांना घटनेची माहिती मिळताच पोलीस निरीक्षक राजीव हाके आपल्या सहकऱ्यांसह घटनास्थळी पोहोचले. घटनास्थळाचा पंचनामा केल्यानंतर आशिषचा मृतदेह पोलिसांनी पोस्टमार्टमसाठी कामठी येथील उपजिल्हा रुग्णालयात पाठविला. पोलिसांनी ट्रक ताब्यात घेत ठाण्यात जमा केला आहे. सार्थक कलोडे यांच्या तक्रारीवरुन पोलिसांनी आरोपी ट्रक चालकाविरुद्ध भांदविच्या कलम २७९, ३०४(ए), १८४ अन्वये गुन्हा दाखल केला.ओवाळणी अन् नवीन कपडेअत्यंत मनमिळावू आणि नम्र असलेला आशिष कुणी, कोणत्याही कामासाठी आवाज दिला तरी धावून जायचा. त्यामुळे येथील मूळ निवासी नसला तरी स्रेहनगरातील अनेकांच्या घरातील सदस्यासारखा होता. भाऊबीजेच्या निमित्ताने बहिणीने शुक्रवारी सायंकाळी ओवाळले. त्यावेळी तिने घेतलेले नवीन कपडे घालूनच तो आज घरून निघाला. मेयो चौकातील कार्यालयात जाण्याऐवजी तो मनसरकडे गेला अन् नंतर त्याच्या अपघाती मृत्यूची वार्ताच नागपुरात आली. मृत्यूचे वृत्त स्रेहनगरात शोककळा पसरवणारे ठरले. त्याच्या अनेक मित्रांना जबर मानसिक धक्का बसला आहे. सायंकाळी त्याचा मृतदेह काही वेळेसाठी स्रेहनगरात अंत्यदर्शनासाठी आणण्यात आला. यावेळी त्याच्या मित्रांनाच नव्हे तर आजूबाजूच्या महिलांनाही अश्रू आवरणे कठीण झाले. सायंकाळी आशिषचा मृतदेह त्याच्या मूळ गावाकडे रवाना करण्यात आला.