रेकॉर्डिंग बॉक्समधील डाटा गहाळ?

संग्राम बारमधील खूनप्रकरणी अद्याप कोणताही आरोपी पोलिसांना गवसलेला नाही. या बारमधील सीसीटीव्हीला संलग्न असलेल्या रेकॉर्डिंग बॉक्समधील डाटा गहाळ करण्यात आल्याने, आरोपींना हुडकून काढणे

संग्राम बार खून प्रकरण : आरोपी बेपत्ताच
नागपूर : संग्राम बारमधील खूनप्रकरणी अद्याप कोणताही आरोपी पोलिसांना गवसलेला नाही. या बारमधील सीसीटीव्हीला संलग्न असलेल्या रेकॉर्डिंग बॉक्समधील डाटा गहाळ करण्यात आल्याने, आरोपींना हुडकून काढणे पोलिसांना मुश्किल होत आहे. १० जूनच्या रात्री १.४५ वाजताच्या सुमारास गाण्याची फर्माईश केल्यावरून पाच-सहा अनोळखी व्यक्तींनी सीताबर्डी येथील सुमित सुरेश तिवारी या तरुणाचा खून करून मोहम्मद रियाज हक याला गंभीररीत्या जखमी केले होते. गैरप्रकार रोखण्यासाठी या बारमध्ये सीसीटीव्ही कॅमेरे लावण्यात आलेले आहेत. हाणामारी आणि खुनाची घटना घडताच भाड्याने आॅर्केस्ट्रा फ्लोअर चालविणारा राजू आणि बारचा व्यवस्थापक किशोर यांनी कॅमेऱ्याला संलग्न रेकॉर्डिंग बॉक्स गहाळ केला. वस्तुत: या कॅमेऱ्यात चार बालांचा डान्स, सुरू असलेला धिंगाणा, हाणामारी आणि खुनीहल्ल्याचे चित्रीकरण झाले होते. बॉक्स पोलिसांच्या हाती लागून आपले बिंग फुटेल म्हणून या दोघांनी बारबाला आणि रेकॉर्डिंग बॉक्स गहाळ केला.
सूत्रांकडून मिळालेल्या माहितीनुसार, काल दिवसभर पोलिसांनी रेकॉर्डिंग बॉक्सबाबत चौकशी केली असता, राजू आणि किशोर यांनी चक्क आपणाला काहीही माहीत नसल्याचे सांगितले होते. त्यामुळे संतापलेल्या पोलिसांनी या दोघांना ताब्यात घेऊन त्यांना बाजीराव दाखवताच त्यांनी बॉक्स आणून दिला. परंतु या बॉक्समधील संपूर्ण डाटा गहाळ करण्यात आल्याचा पोलिसांना संशय आहे. बारबालांचा पुरवठा करणारा राजू याने सध्या शहरातील तीन बारमधील आॅर्केस्ट्रा फ्लोअर भाड्याने घेतलेले आहे. त्यामुळे मोठ्या प्रमाणावर पैसा कमावण्याच्या लालसेने आॅर्केस्ट्राच्या आड तो डान्स फ्लोअरही चालवायचा. राजू याला यापूर्वी बंगलोर, मुंबई, सोनेगाव, सीताबर्डी, प्रतापनगर पोलिसांनी अटक केलेली आहे. आॅर्केस्ट्रा फ्लोअर भाड्याने देणे हा परवान्यातील अटींचा भंग आहे. (प्रतिनिधी)